Палітоляг, старшыня Беларускага Шуманаўскага таварыства Ігар Лялькоў падкрэсьлівае, што міжнародная супольнасьць пазьбягае кантактаў з абодвума рэжымамі – беларускім ды іранскім:“Рэжымы, якія трапляюць у ізаляцыю ад асноўнай часткі міжнароднай супольнасьці, натуральна, цягне адзін да аднаго. Ня думаю, што Беларусі ад гэтага візыту будзе вялікі прыбытак. Але ж можна прадэманстраваць, што мы не адны такія ў гэтым сьвеце. І беларускі рэжым спрабуе гэта зрабіць”.
“Менск і Тэгеран аб’ядноўвае антыамэрыканізм”
Яшчэ адзін менскі палітоляг – Андрэй Фёдараў падзяляе гэтую ж думку:“Як беларускія, так і іранскія ўлады ня вельмі шырока прымаюцца ў сьвеце. У іх даволі абмежаванае кола замежных візытаў. І гэта таксама спрыяе іх добрым адносінам – яны лічаць, што заслугоўваюць лепшага”.
Андрэй Фёдараў упэўнены, што афіцыйныя Менск і Тэгеран аб’ядноўвае антыамэрыканізм. Прычым, ні Аляксандар Лукашэнка, ні Махмуд Ахмадзінэжад гэтага і не хаваюць:
“Яны знаходзяцца ў супрацьстаяньні з краінай, якая, на іх меркаваньне, лічыць сябе гегемонам і хоча падпарадкаваць сабе ўвесь сьвет. Гэта – ЗША. Таму антыамэрыканізм – адзін з аб’яднаўчых матываў, які зьвязвае беларускае ды іранскае кіраўніцтва”.
Агульныя тэмы: нафта і зброя
Аглядальнікі ўпэўненыя, што, як мінімум, дзьве тэмы стануць асабліва важнымі на перамовах у Менску.
Першая – магчымасьць Беларусі атрымліваць іранскую нафту. Цяпер Менск шукае самыя разнастайныя шляхі дывэрсыфікацыі энэрганосьбітаў. Таму шмат спадзяваньняў ускладаецца на нафту з Вэнэсуэлы і Ірану.
Другая тэма – зброя. Сёлета ў студзені Тэгеран наведаў міністар абароны Беларусі Леанід Мальцаў. Там ён правёў перамовы з камандуючым корпусам “вартаўнікоў ісламскай рэвалюцыі” генэралам Рахімам Сафаві. Пасьля іх іранскі генэрал заявіў: “Іран і Беларусь могуць поўнамаштабна супрацоўнічаць з улікам сумесных інтарэсаў і агульных пагрозаў. Мы маем зь Беларусьсю і Расеяй агульныя погляды і агульныя пагрозы. І можам супрацоўнічаць у каротка- і доўгатэрміновай пэрспэктыве”.
Кіраўнік Беларусі Аляксандар Лукашэнка апошні раз наведваў Іран у лістападзе 2006 году. А ў верасьні 2004 году адбыўся візыт у Беларусь тагачаснага прэзыдэнта Ірану Махамада Хатамі.
