Лінкі ўнівэрсальнага доступу

Горадня: актывістам АГП не дазволілі пікетаў


Міхал Карневіч, Горадня Актывісты Аб’яднанай грамадзянскай партыі ў Горадні плянавалі правесьці некалькі пікетаў, каб сабраць подпісы супраць разбурэньня старой часткі гораду.

У адмове гарвыканкаму, паводле Юр’я Істоміна, кіраўніка абласной структуры АГП, гаворыцца, што ў месцах, дзе заявілі пікеты, забароненыя масавыя мерапрыемствы.

Пікеты плянавалася выстаўляць на вуліцы Горкага — недалёка ад пагранатраду, побач з уваходам у стадыён “Нёман” і на вуліцы Дзяржынскага на ўваходзе ў парк Жылібэра.

Паводле Юр’я Істоміна, подпісы плянавалася зьбіраць для перадачы ў пракуратуру вобласьці, а таксама ў адміністрацыю прэзыдэнта.

Істомін ня згодны з такім рашэньнем гарадзкіх уладаў — лічыць, што яно перадузятае й намераны разам зь іншымі сябрамі партыі абскарджваць яго ў судзе.

Спадар Істомін таксама нагадвае, што за апошнія тры месяцы гарадзенскія ўлады ўжо тройчы адмаўлялі ім у правядзеньні пікетаў.
XS
SM
MD
LG