Лінкі ўнівэрсальнага доступу

КДБ папярэдзіў чалавека, які зьбіраўся ўзарваць помнік Арджанікідзэ


Алег Грузьдзіловіч, Менск КДБ Беларусі выкрыў і папярэдзіў актывіста дэмакратычнага руху з Барысава, які нібыта плянаваў узарваць помнік Арджанікідзэ ў цэнтры гораду. У лягеры дэмакратаў сумняюцца, што прызнаньне было шчырым, і зьвязваюць яго з прапагандысцкай кампаніяй напярэдадні “Чарнобыльскага шляху”. Перадае Алег Грузьдзіловіч

Жыхар Барысава Аляксандар Малчанаў нібыта рыхтаваўся ўзарваць помнік камуністычнаму дзеячу Сэрго Арджанікідзэ, які стаіць у цэнтры Барысава.

Пра гэта паведаміла беларускае тэлебачаньне са спасылкай на КДБ Беларусі. Паводле зьвестак КДБ, Аляксандар Малчанаў нібыта кантактаваў зь незарэгістраванай арганізацыяй “Зубар” і раней яго ўжо затрымлівалі за ўдзел у несанкцыянаваных акцыях.

Сьледчыя КДБ папярэдзілі актывіста пра адказнасьць паводле артыкулу аб тэрарызьме. Пра гэта склалі пратакол, які далучаць да крымінальнай справы, калі Малчанаў ня спыніць падобнай дзейнасьці, паведамілі ў КДБ.

Мне не ўдалося знайсьці Аляксандра Малчанава, каб атрымаць ягоны камэнтар да зьвестак КДБ пра рыхтаваны падрыў помніка.

Некалькі актывістаў дэмакратычнага руху ў Барысаве, мясцовы журналіст і праваабаронца пра такога чалавека нічога ня чулі.

Аляксандра Малчанава згадаў толькі актывіст Андрэй Бабіцкі — але ён сказаў, што “той ужо некалькі гадоў ні ў чым ня ўдзельнічае”.

Аповед пра прызнаньне Малчанава, які плянаваў падрыў помніка Арджанікідзэ, насьмяшыў Бабіцкага:

“Проста я ведаю гэтага хлопца і ня веру, што ён мог такое зрабіць”.

“Але ж яго паказалі ў сюжэце, ён сядзеў у кабінэце сьледчага і ўсё прызнаваў”.

“Ну вы ж ведаеце, як у нас прызнаюцца ў кабінэце сьледчага”, — кажа барысаўскі актывіст Андрэй Бабіцкі.

Ці сапраўды Аляксандар Малчанаў удзельнічаў у дэмакратычным руху? Праваабаронцы пацьвердзілі, што ў 2005 годзе яго затрымлівала міліцыя за ўдзел у зборы подпісаў за вызваленьне палітвязьня Міхаіла Марыніча.

Але што да незарэгістраванай арганізацыі “Зубар”, былыя актывісты гэтай арганізацыі не згадалі пра ўдзел Аляксандра Малчанава з Барысава.

“Мяркую, гэта робіцца дзеля таго, каб запалохаць моладзь, і асабліва бацькоў, каб яны не пусьцілі сваіх дзяцей на “Чарнобыльскі шлях”, — кажа былая актывістка Ірына Тоўсьцік.

У цэнтры інфармацыі й грамадзкіх сувязяў КДБ Беларусі пацьвердзілі зьвесткі пра тое, што былы актывіст рыхтаваў падрыў помніка Арджанікідзэ. Але там не пракамэнтавалі меркаваньня, што такія зьвесткі наўмысна распаўсюджаныя напярэдадні “Чарнобыльскага шляху”.
XS
SM
MD
LG