Лінкі ўнівэрсальнага доступу

Смаргонь: 18-гадовага актывіста судзяць за распаўсюд рэклямы Радыё Свабода


Міхал Карневіч, Смаргонь Міліцыянты затрымалі Ўладзімера Шульжыцкага за тое, што ён раскідаў у паштовыя скрынкі самаробную рэкляму Радыё Свабода. Але пратакол склалі нібы за тое, што нецэнзурна лаяўся. Сёньня ў судзе адвакат запатрабаваў, каб у справе былі сьведкі. Суд адклалі на заўтра, на дзясятую раніцы.

Уладзімер Шульжыцкі з асабістай ініцыятывы на невялікіх аркушах пісаў абвесткі зь пералікам хваляў Радыё Свабода i раскідаў іх у паштовыя скрынкі.

На аркушах ён дапісваў свой мабільны тэлефон –на выпадак, калі ў некага не атрымаецца наладаваць прымач. Гэтак яго і знайшлі міліцыянты.

Вось што апавядае сам Уладзімер Шульжыцкі:

“Яны мне патэлефанавалі перад працай, і мы з гэтым чалавекам дамовіліся сустрэцца. Ён мне назваў адрас. Я й пайшоў на той адрас, а там амаль пад самымі дзьвярыма мяне чакалі ўчастковы й яшчэ нейкі міліцыянт”.

Міліцыянты сказалі, што шукаюць рабаўніка, які нібыта заходзіць у гэты пад’езд, і папрасілі пайсьці ў пастарунак, каб спраўдзіць дакумэнты. Там ужо й склалі на Шульжыцкага пратакол за нецэнзурную лаянку.

Ноч актывіст правёў у камэры спэцпрымальніка. Сёньня ў судзе адвакат Шульжыцкага запатрабаваў сьведкаў – міліцыянтаў, якія яго затрымоўвалі й складалі пратакол.

Сёньня Уладзімера Шульжыцкага адпусьцілі на волю. Суд адбудзецца заўтра а 10-й гадзіне.

Пытаюся ў спадара Шульжыцкага аб матывах ягонага ўчынку:

“Я папросту ня бачу іншай альтэрнатывы, каб данесьці да людзей праўдзівую інфармацыю. Мяркую, што Радыё Свабода – дэмакратычны сродак масавай інфармацыі і толькі яно здольнае скласьці канкурэнцыю дзяржаўнай прапагандзе”.

Уладзімер Шульжыцкі беспартыйны, на мінулых выбарах балятаваўся ў дэпутаты мясцовага савету, аднак дэпутатам ня стаў.

Уладзімер Шульжыцкі беспартыйны, на мінулых выбарах балятаваўся ў дэпутаты мясцовага савету, аднак дэпутатам ня стаў. Яму васямнаццаць гадоў, скончыў вучэльню прыборабудаваньня, працуе на нямецкім прадпрыемстве, якое займаецца дрэваапрацоўкай.
XS
SM
MD
LG