Лінкі ўнівэрсальнага доступу

Споўнілася дзесяць гадоў “Газэце Слонімскай”


Альгерд Невяроўскі, Менск Шырока адзначаць юбілей калектыў недзяржаўнага тыднёвіка не зьбіраецца. Паводле галоўнага рэдактара Віктара Валадашчука, час для выдаваньня недзяржаўных рэгіянальных газэт цяпер у Беларусі не найлепшы. Многія выданьні штрафуюць, пазбаўляюць магчымасьці распаўсюджваньня, ўрэшце ліквідуюць.

24 красавіка 1997 году выйшаў першы нумар адноўленай “Газэты Слонімскай”. Газэта з такой жа назвай, але на польскай мове, была заснаваная ў Слоніме ў сьнежні 1938 году беларускім паэтам Сяргеям Новікам-Пеюном і ягонай жонкай Людмілай. Але неўзабаве выданьне было ліквідаванае польскімі ўладамі паводле палітычных матываў. Праз 58 гадоў газэту аднавіў журналіст Віктар Валадашчук:

“Мы вырашылі ўзяць гэтую спадчыну, назву-брэнд і такім чынам яна й пачала выходзіць. Першы нумар газэты быў зусім тонкі, зь невялікім накладам у тры тысячы. За 10 гадоў было ўсё: газэта па крысе таўсьцела, павялічваўся наклад. Былі праблемы і з кадрамі, і з памяшканьнем, і з перарэгістрацыяй”.

Цяпер “Газэта Слонімская” выходзіць на 40 палосах, накладам ад 7 да 8 тысяч асобнікаў і распаўсюджваецца ў Слонімскім, Дзятлаўскім, Зэльвенскім, Мастоўскім і Ваўкавыскім раёнах Гарадзеншчыны. Як і многія іншыя недзяржаўныя выданьні, “Газэту Слонімскую” не распаўсюджваюць “Белпошта” і ”Белсаюздрук”. Рэдакцыя стварыла ўласную сыстэму распаўсюду. Віктар Валадашчук гаворыць, што будучыня газэты абсалютна няпэўная:

“На сёньняшні час гаварыць пра нейкія пэрспэктывы, будаваць нейкія бізнэс-пляны вельмі цяжка. І разьлічваць на нешта. Мы з калегамі часта гаворым на гэтыя тэмы. Дзякуй Богу, што газэты выходзяць – і гэта добра”.

Галоўны рэдактар “Газэты Слонімскай” гаворыць, што 10-гадовы юбілей калектыў адзначыць, але ня сёньня і вельмі сьціпла.

Колькасьць рэгіянальных незалежных грамадзка-палітычных выданьняў ў Беларусі скарачаецца з кожным годам. Гаворыць сябра Таварыства разьвіцьця рэгіянальнай прэсы пры Беларускай асацыяцыі журналістаў, галоўны рэдактар баранавіцкай газэты “Intex-press” Уладзімер Янукевіч:

“Калі ў нас існаваў Фонд разьвіцьця рэгіянальнай прэсы, то ў гэты наш фонд уваходзіла 24 выданьні. А цяпер, калі мы стварылі таварыства, ужо толькі 14 тых, хто рэальна ўвайшоў. А астатнія напэўна палохаюцца ўступаць. Таму, што мы дэкляруем прафэсійны падыход да працы. Гэта павінна быць аб’ектыўная, незалежная, усебаковая інфармацыя”.
XS
SM
MD
LG