Лінкі ўнівэрсальнага доступу

logo-print

Вярхоўны суд не задаволіў пазову “Саюзу левых сілаў”


Альгерд Невяроўскі, Менск Лідэры “Саюзу левых сілаў” дамагаліся, каб суд адмяніў рашэньне Міністэрства юстыцыі. Раней Мін’юст адмовіўся зарэгістраваць гэтае палітычнае аб’яднаньне. З адзінаццаці пунктаў, якія нібыта парушалі заканадаўства, судзьдзя Кулік прызнала правамернасьць толькі двух. Лідэры саюзу зьбіраюцца правесьці новую ўстаноўчую канфэрэнцыю.

Гэты пазоў разглядаўся ў Вярхоўным судзе Беларусі два дні. Міністэрства юстыцыі адмовілася рэгістраваць “Саюз левых сілаў” — на думку чыноўнікаў, яго стваральнікі адзінаццаць разоў парушылі заканадаўства. Але суд прызнаў парушэньні закону толькі ў двух выпадках.

“На мой погляд, было прынятае добрае рашэньне, – лічыць сустаршыня “Саюзу левых сілаў” Сяргей Калякін. – Бо з усіх адзінаццаці пунктаў прэтэнзіяў суд прызнаў толькі два – як падставу, каб нам адмовіць”.
Сяргей Калякін: “Найбліжэйшым часам мы правядзем устаноўчую канфэрэнцыю ў Беларусі. Пацьвердзім тыя дакумэнты, якія былі пададзеныя, і саюз будзе зарэгістраваны”.
Паводле Калякіна, аднаго з гэтых пунктаў стваральнікі “Саюзу левых сілаў” нават не аспрэчвалі. Рэч у тым, што Беларуская сацыял-дэмакратычная партыя (Грамада) падала статут, завераны асобай, якая ня мела на тое паўнамоцтваў.

“З другім пунктам, які прыняў суд, я ня згодны, – працягвае Сяргей Калякін. – Гаворка ідзе пра тое, што адпаведна статуту партыі, якія стварылі саюз, ня могуць праводзіць сваіх мерапрыемстваў па-за межамі Беларусі. Прычым не таму, што гэта забараняе заканадаўства, а таму, што ў саміх статутах палітычных партыяў ёсьць нібыта такое абмежаваньне".

Паводле Калякіна, найбліжэйшым часам стваральнікі “Саюзу левых сілаў” правядуць устаноўчую канфэрэнцыю ў Беларусі. “Мы пацьвердзім тыя дакумэнты, якія былі пададзеныя, і саюз будзе зарэгістраваны”, – упэўнены сустаршыня палітычнага аб’яднаньня.

“Саюз левых сілаў” стварылі Партыя камуністаў беларуская, Беларуская сацыял-дэмакратычная партыя (Грамада) і партыя жанчын “Надзея”.

Устаноўчая канфэрэнцыя адбылася летась 17 сьнежня ва ўкраінскім Чарнігаве: у Беларусі не знайшлося месца для яе правядзеньня.
XS
SM
MD
LG