Лінкі ўнівэрсальнага доступу

У Магілёве, Горках і Крычаве адзначаюць Дзень Волі


Радыё Свабода Нягледзячы на тое, што многія актывісты паехалі адзначаць Дзень Волі ў Менск, у гарадах Магілёўшчыны праходзяць сьвяточныя мерапрыемствы, прымеркаваныя да 89-й гадавіны БНР.

У Магілёве грамадзкія й партыйныя актывісты выйшлі на цэнтральныя вуліцы гораду зь бел-чырвона-белымі шалікамі.

Яны распаўсюджвалі зварот старшыні Рады Беларускай Народнай Рэспублікі Івонкі Сурвілы да грамадзянаў Беларусі, а таксама паштоўкі да Дня Волі.

Цягам дня да будынку краязнаўчага музэю ўскладалі бел-чырвона-белыя гвазьдзікі. У гэтым будынку 12 ліпеня 1918 году магілёўская грамадзкасьць ухваліла абвяшчэньне незалежнасьці Беларускай Народнай Рэспублікі.

Нагадаем, што Магілёўскі гарвыканкам забараніў правядзеньне ў горадзе шэсьця ды мітынгу да Дня Волі.

У Горках грамадзкія актывісты Дзень Волі адзначаюць распаўсюдам паштовак зь беларускай нацыянальнай сымболікай. Напярэдадні Дня Волі выйшаў сьвяточны нумар горацкай газэты “Ўзгорак”.

У Крычаве прайшла ўрачыстая вечарына, прымеркаваная да Дня Волі. Як і ў Горках, напярэдадні выйшаў сьвяточны нумар крычаўскай газэты “Вольны горад”. Рэдактара выданьня за два дні да 25 сакавіка выклікалі да пракурора раёну, які папярэдзіў пра адказнасьць за несанкцыянаваныя публічныя мерапрыемствы.
XS
SM
MD
LG