Лінкі ўнівэрсальнага доступу

Салідарныя зь Беларусьсю польскія зоркі будуць сьпяваць Боба Марлі


Аляксей Дзікавіцкі, Варшава Заўтра ў Варшаве адбудзецца грандыёзны канцэрт “Салідарныя зь Беларусьсю”, у якім возьме ўдзел шэраг зорак польскай эстрады першай вялічыні. Між тым, некаторыя беларускія музыкі адмовіліся ад удзелу ў гэтай імпрэзе, бо песьні Боба Марлі, зь якіх пераважна будзе складацца канцэрт, на іхную думку, ня маюць нічога агульнага зь Беларусьсю.

Гэта песьня “Бяз слоў”, адмыслова напісаная Кубай Падольскім з гурту “Triquetra” і запісаная польскімі зоркамі для рэклямы канцэрту “Салідарныя зь Беларусьсю” (слухаць):



Знанаму беларускаму рэпэру Амбасадару Кроў з гурта “Чырвоным па белым”, аднак, такі падыход не падабаецца. Ён лічыць, што беларускія выканаўцы павінны сьпяваць уласныя песьні:

“Польскія музыкі няхай бы выконвалі свае песьні, а беларускія – свае. Боб Марлі гэта асоба сусьветнавядомая, але яна ня мае ніякага дачыненьня да Беларусі”.

Галоўныя арганізатары канцэрту – польскае тэлебачанье, арганізацыя “Свабодная Беларусь”, аднак, кажуць, што галоўная мэта імпрэзы – прыцягнуць увагу як мага большай колькасьці палякаў, таму выкарыстаньне ў канцэрце матываў творчасьці Боба Марлі абсалютна абгрунтаванае. Вось што сказаў нашаму радыё Куба Міхалоўскі – адзін зь лідэраў ініцыятывы “Свабодная Беларусь”:

“Рэгі – гэта музыка свабоды і міру, гэта пазытыўная музыка, бо мы ня хочам, каб канцэрт быў сумны, ня хочам паказваць, што ўсё дрэнна, але наадварот – як можа быць лепей. Сёлета выступяць больш польскіх музыкаў, але варта памятаць, што ўсё гэта адбываецца пад адзіным агульным лёзунгам “Дэмакратыя і свабода Беларусі!”.

Пачатак канцэрту – у нядзелю а 21-й паводле менскага часу на Замкавым пляцы ў Варшаве. Трансьляцыя: “TVP1”, “Polonia”.
XS
SM
MD
LG