Лінкі ўнівэрсальнага доступу

Што думаюць гарадзенцы пра дзень 25 сакавіка?


Радыё Свабода Што для вас азначае дата 25 сакавіка? Што ведаеце пра Беларускую Народную Рэспубліку? На гэтыя пытаньні адказвалі жыхары Горадні.

Маладзён: “Дзень стварэньня нашай рэспублікі — гэта важная дата, паколькі мы асобная, сувэрэнная дзяржава. Мы павінны адзначаць яе. А тое, што ўлады ня хочуць адзначаць, то кожны, хто сам жадае яе адзначыць, ён гэта зробіць”.

Студэнт: “Ведаем мы пра гэта вельмі мала, як і асноўная маса людзей, што жывуць у нашым горадзе. Да пытаньняў гісторыі трэба ставіцца больш уважліва, каб грамадзянін Рэспублікі Беларусь валодаў пэўнымі ведамі й быў самасьвядомы”.

Ягоны сябра: “Людзі на плошчы ў сталіцы зьбіраюцца, каб успомніць гэтую дату, аддаць належнае памяці: бо гэта было некалі ўсё-ткі”.

Маладзён: “Я лічу, гэтую дату варта адзначаць, яна адыгрывае пэўную ролю ў гісторыі Беларусі”.

Студэнт: “Дата гэтая, канечне, вядомая ўсім — Дзень Волі 25 сакавіка. Адзначаць не даюць, паколькі афіцыйна гэтага сьвята няма, афіцыйна адзначаецца іншая дата. Але я лічу, што гэта нашая гісторыя, і трэба дазваляць людзям адзначаць тое, што яны хочуць”.

Ягоная сяброўка: “Адзначаць не адзначаем, але дату гэтую ведаем”.

Малады спадар: “Помню гэтую дату, ведаю — і ўсё”.

Маладзён: “Мне даслалі СМС з прапановай прыехаць у Менск на плошчу пастаяць за рэспубліку. 25-га буду ў Менску, можа нават пабываю на плошчы. Бо, у маім разуменьні, некаторыя рэчы яшчэ не зусім састарэлі”.

Малады спадар: “Адзначаць гэтую дату можа й трэба было б, на маю думку”.

Ягоны сябра: “Ведаю пра 25 сакавіка, вывучалі па гісторыі. На маю думку, можна было б адзначаць гэтае сьвята”.

Спадар: “Канечне, варта адзначаць, гэта нашая гісторыя. У мяне шмат знаёмых: адны ведаюць пра гэта, іншыя — не”.

Дзяўчына: “Ведаю, што 25 сакавіка — гэта дзень стварэньня Беларускай Народнай Рэспублікі, праходзілі па гісторыі ў школе. Але гэтая дата не адзначаецца. Мо варта было б адзначаць, а мо й не, ня ведаю”.

Малады спадар: “Для кожнай рэспублікі любая дата, якая датычыць яе незалежнасьці, важная. 25 сакавіка 1918 году — адзначаць гэтую дату, я лічу, можна, нічога ў ёй апазыцыйнага няма. Інакш ня будзем памятаць гісторыю сваёй краіны — а калі няма гісторыі, то няма мінуўшчыны й няма будучыні”.

На здымку: у гэтым гарадзенскім будынку, паводле шэрагу гісторыкаў, ў 1919 годзе кароткі час месьціўся ўрад БНР. 25 сакавіка 1996 году на даху будынку зьявіўся бел-чырвона-белы сьцяг, які вісеў некалькі дзён.

XS
SM
MD
LG