Лінкі ўнівэрсальнага доступу

Летась у Беларусі было заведзена 567 спраў супраць гандляроў людзьмі


Радыё Свабода, Нью-Ёрк Міністар унутраных справаў Беларусі Ўладзімер Навумаў і намесьніца кіраўніка адміністрацыі прэзыдэнта Натальля Пяткевіч удзельнічаюць у канфэрэнцыі ААН па барацьбе з гандлем жанчынамі, якая адбываецца ў Нью-Ёрку.

Падчас прэсавай канфэрэнцыі Пяткевіч і Навумаў заявілі, што Беларусь – лідэр сярод краінаў СНД у барацьбе з сэксуальным нявольніцтвам. Міністар Навумаў сказаў:

“Многія краіны СНД пакуль нават не прызнаюць, што такая праблема існуе і імкнуцца ухіляцца нават ад прызнаньня, а ня тое што ад арганізацыі працы. Таму мы зараз адчуваем вялікія цяжкасьці, калі імкнёмся у сваёй рэспубліцы ўсё актыўней у гэтым накірунку працаваць”.

У 2006 годзе ў Беларусі было заведзена 567 крымінальных спраў супраць гандляроў “жывым таварам”. Беларускае заканадаўства прадугледжвае да 10 гадоў зьняволеньня за ўдзел у гандлі жанчынамі. Аналізуючы прычыны распаўсюду гэтага злачынства, Натальля Пяткевіч адзначыла наступную:

Пяткевіч: “На жаль, калі мы аналізавалі прычыны, чаму мае месца гандаль людзьмі, у прыватнасьці ў Беларусі, нельга выключаць, што тут шмат неабачлівасьці. Дзяўчаты едуць уладкоўвацца на працу, рэалізуюць свае таленты, будуць сьпяваць, таньчыць, думаючы, што недзе нешта абстрактна можа здарыцца, але толькі не са мной”.
XS
SM
MD
LG