Лінкі ўнівэрсальнага доступу

“Учора ўвечары менчукі зрабіліся сьведкамі ўнікальнай для нашага гораду зьявы — моцнага хістаньня зямной кары”


Падрыхтаваў Зьміцер Падбярэскі Пра што пісалі беларускія газэты 5 сакавіка ў розныя гады мінулага.

Вітаю вас на хвалях Беларускай Свабоды! Вось як выглядаў дзень 5 сакавіка розных гадоў у публікацыях беларускіх газэт.

“Красноармейская правда” ў 1927 годзе паведамляе: “Дзяржгандлем Беларусі сёлета плянуецца падрыхтаваць для вывазу за мяжу дрожджы, гліцэрын, патаку, рогі, капыты, пясок на паліву, белую паліву, ганчарныя вырабы, рыбу, бульбяную муку. З Барысаўскай акругі дасылаюцца ў Нямеччыну ўзоры ганчарных вырабаў і лускІ рыбы. Мазыр атрымаў заданьне выявіць магчымасьць экспарту рыбы. Беларуская рыба, у прыватнасьці Мазырскай акругі, можа быць рэалізаваная ў Польшчы, гэтаму спрыяе блізкасьць мяжы”.

“Бальшэвік Палесся” ў 1937 годзе зьмяшчае ўрадавае паведамленьне: “Урад БССР паведамляе ўсіх працоўных Беларусі, што ў Віцебску ў ноч на 1 сакавіка ад варожай рукі загінуў буйны мастак БССР Пэн Юрый Майсеевіч… Не стала чулага, глыбока дэмакратычнага, гуманнага мастака, які спачуваў усім абяздоленым і змог гэта спачуванне перадаць у сваіх праўдзівых творах. Творчая спадчына гэтага выдатнага мастака з’явіцца школай для маладых советскіх мастакоў і будзе шырока выкарыстана ў інтарэсах працоўных нашай краіны”.

“Учора ўвечары менчукі зрабіліся сьведкамі ўнікальнай для нашага гораду зьявы — моцнага хістаньня зямной кары, — піша ў 1977 годзе “Вечерний Минск”. — “Так, у Менску быў землятрус, — гаворыць загадчык абсэрваторыі, кандыдат геалягічна-мінэралягічных навук Ю.Н.Кузьняцоў. — Землятрус, эпіцэнтар якога цяпер удакладняецца, пачаўся ў 22 гадзіны 23 хвіліны 56 сэкунд. Найбольш моцны быў першы штуршок — да чатырох балаў, ён адчуваўся 2—5 хвілінаў. Затым цягам некалькіх гадзінаў ішлі паўторныя штуршкі, але яны былі менш моцныя”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG