Лінкі ўнівэрсальнага доступу

Партыя БНФ пагадзілася са стратэгічнай канцэпцыяй акцыі 25 сакавіка


Радыё Свабода Сойм Партыі БНФ абмеркаваў стратэгічны кантэкст акцыі 25 сакавіка ў гонар гадавіны ўтварэньня Беларускай Народнай Рэспублікі, паведамляе прэсавая служба партыі. "Мы стратэгічна ацэньваем сытуацыю як новую, - сказаў старшыня Партыі БНФ Вінцук Вячорка. - Гэта датычыць і эканомікі, і ступені зьяднанасьці цяперашняй кіроўнай эліты, і замежнапалітычнага становішча Беларусі. Усе праблемы, якія адчуваюцца ва ўсіх гэтых сфэрах, - гэта, з аднаго боку, пагроза для незалежнасьці Беларусі, а з другога боку, гэта дае шанец для незалежніцкіх дэмакратычных сілаў".

Сойм пагадзіўся з канцэпцыяй 25 сакавіка як дня, у які дэмакратычныя сілы Беларусі дэманструюць нацыянальнае яднаньне вакол ідэі незалежнасьці, і як дня, калі цяперашняя ўлада набывае магчымасьць прадэманстраваць гатоўнасць рабіць нейкія крокі да дэмакратыі, а тым самым да дапамогі з боку ЕС. "Мы ёй такі шанец даем", - заявіў Вінцук Вячорка.

Кіраўнікі абласных структураў партыі атрымалі даручэнне стварыць арганізацыйныя камітэты акцыі 25 сакавіка ва ўсіх абласцях Беларусі, паведамляе БелаПАН.
XS
SM
MD
LG