Лінкі ўнівэрсальнага доступу

Выратаваць эканоміку павінна Дырэктыва аб эканоміі


Радыё Свабода На даручэньне Аляксандра Лукашэнкі ў Беларусі распрацоўваецца Дырэктыва №3 аб эканоміі і беражлівасьці. Эканомія энэргарэсурсаў – пытаньне, якое набыло ў Беларусі палітычнае гучаньне. Перад краінай пастаўлена задача: спажываць энэргарэсурсаў як мага менш.

Ужо абвешчана, што са студзеня падвышаецца квартплата, камунальныя плацяжы. І каб сямейны бюджэт вытрымаў гэтую падвышку, улада заклікае эканоміць на ўсім. Што думаюць наконт эканоміі людзі?

Карэспандэнтка: Як вы думаеце, ці магчыма эканоміць у вашай асабістай гаспадарцы: менш гатаваць, менш пральнай машынай карыстацца, прасам?

Спадарыня: “Так, канечне. Я заўсёды хаджу і за ўсімі выключаю сьвет, на ўсім эканомлю. Але гэта ня робяць усе”.

Карэспандэнтка: “А пліта, газ, гатаваньне?”

Спадарыня: “У прынцыпе, так. Мой сын не заўсёды выключае газ, калі гэта трэба. Я думаю, можна эканоміць”.

Спадар: “Ай, гэта несур’ёзнае пытаньне”.

Спадарыня: “Сапраўды, можна эканоміць, выключаць сьвятло, закрываць ваду”.

Спадар: “Канечне, можна, калі чаю закіпяціў, і усё. А бялізну рукамі праць. Боршч можна зварыць і на тры дні. А так – чаю пагрэў, пельмені, ці што-небудзь хуткага прыгатаваньня”.

Дзяўчына: “Я абсалютна не гатова эканоміць. Я не змагу перавучыць сябе менш уключаць сьвятло альбо вады менш ужываць. Усё будзе, як і было”.

Іван Анташкевіч, які шмат гадоў ўзначальваў гарадзкую жыльлёва-камунальную гаспадарку, перакананы:

“У той сыстэме палітэканамічных каардынат, у якой знаходзіцца краіна, без пераўтварэньняў палітычных і эканамічных гэта ня дасьць нічога – ні дырэктыва №3, ні дырэктыва №10. Каб штосьці эканоміць, у чалавека павінна быць матывацыя”.

Што тычыцца эканоміі электраэнэргіі ў асобнай кватэры, чалавек яшчэ зацікаўлены эканоміць, бо плаціць толькі за скарыстаную энэргію па лічыльніку. Дарэчы, “Менскэнэрга” распрацавала праграму па зьніжэньні спажываньня энэргарэсурсаў. Для яе выкананьня спатрэбіцца 75 з паловай мільярдаў рублёў а калі разьлікі распрацоўшчыкаў акажуцца правільнымі, гадавая эканомія складзе 38 мільярдаў.

Але што тычыцца, да прыкладу, аплаты ацяпленьня – кватэраўладальнік ня можа ніяк на гэта ўплываць. Сёлета цёплая зіма, здавалася б, можна было тапіць менш. Але тапілі як звычайна, а людзі адкрывалі форткі, фрамугі, кажа Іван Анташкевіч.

Анташкевіч: “Чалавек ня ведае, што такое прыборы ўліку на дом, што такое прыборы-рэгулятары, у яго няма ў кватэры прыбораў рэгуляваньня ніякіх. Інструмэнтаў у чалавека, каб штосьці зэканоміць на цеплавой энэргіі няма. Цеплавая энэргія і гарачая вада займаюць 70% у кватэрных плацяжах”.

Існуе манаполія дзяржавы на прыватную ўласнасьць праз ЖЭСы, але і жыльлёва-камунальныя гаспадаркі не зацікаўленыя ў эканоміі, бо ўсё адно яны перакладуць ўсе плацяжы на плечы кватэраўладальнікаў. Меркаваньне адмыслоўцы ў праблемах жыльлёва-камунальнай гаспадаркі Івана Анташкевіча.

Анташкевіч: “У ЖЭСа няма інструмэнту ні ўплыву, ні зацікаўленасьці, ім ўсё адно – горача, халодна, пераплачваю я, не пераплачваю… Гэта вельмі далёкая структура, якая адарваная ад нас. Каб дырэктыва працавала, спачатку трэба рэфармаваць мікрараёны,ЖЭСы. Гэта вялізная праца. На гады. Хутка гэта не папраўляецца”.
XS
SM
MD
LG