Лінкі ўнівэрсальнага доступу

Хамайду прысудзілі "суткі" замест Шчукіна?


Радыё Свабода, Віцебск Затрыманы ўчора Барыс Хамайда даведаўся сёньня ў Першамайскім раённым судзе, што падпаў пад міліцэйскую "арыентыроўку", якая апісвала "чалавека зь сівой барадой", заўважанага каля сярэдняй школы №12 з улёткамі ў руках. І хаця затрымалі спадара Хамайду зусім у іншым краі горада, міліцыянты на судзе засьведчылі, што гэта менавіта тая асоба, якую яны шукалі. Да таго ж, яны абвінавацілі Барыса Хамайду ў тым, што ён іх абражаў у адказ на законнае патрабаваньне паказаць дакумэнты.

Судзьдзя Галіна Блахіна пастанавіла арыштаваць Барыса Хамайду на чацьвёра сутак "за дробнае хуліганства".

Камэнтуючы пастанову, спадар Хамайда пагадзіўся, што яны з Валер’ем Шчукіным сапраўды нечым падобныя. Аднак свой арышт ён зьвязвае ўсё-ткі з набліжэньнем выбараў – з тым, што пакідаць апзыцыянэраў на волі ў такі час улады лічаць небясьпечным.

Хамайда: Я лічу, што мэтанакіравана мяне затрымлівалі. Проста ўзялі гэтую фабулу пра Шчукіна і "прыляпілі" да мяне – бародамі мы падобныя. Гэта ўсё таксама зьвязана з выбарамі, і цяпер на волю я выйду толькі 15-га".

Што да Валер’я Шчукіна, то яго сёньня затрымалі таксама, і менавіта ў раёне сярэдняй школы №12: там месьціцца выбарчы ўчастак №52, куды ён заходзіў па журналісцкай працы – каб пазнаёміцца з хадой датэрміновага галасаваньня. Затрыманага адвезьлі на допыт у Першамайскі райаддзел міліцыі. Праваабаронца Павал Левінаў, які паехаў суправаджаць спадара Шчукіна, не выключае, што той таксама будзе арыштаваны на час выбараў.
XS
SM
MD
LG