Лінкі ўнівэрсальнага доступу

Начная аБЛОГа


Юлія Шарова, Менск Агляд беларускага Інтэрнэту

Тэма, якую сёньня найбольш актыўна абмяркоўваюць на форумах TUT.by Прэзыдэнт Пуцін падлічыў страты ад газавага пагадненьня зь Менскам Выказваньні некаторых ўдзельнікаў:

“Ва ўсіх усё будзе добра. У Эўразьвязе адбудзецца дывэрсыфікацыя энэргазабесьпячэньня, для Расеі – падвысяцца кошты на энэрганосьбіты на ўсясьветным рынку, у Беларусі – стануць болей езьдзіць на роварах, то бок, весьці здаровы лад жыцьця, разважаючы над эфэктыўнай эканомікай і мяняць уяўленьні пра лідэра”.

“Расея ловіць момант для нагнятаньня жарсьцяў і ўтрыманьня цаны на нафту. Зьвярнулі ўвагу на фразу пра скарачэньне здабычы? Яна ж яўна не па беларускай тэме, папросту выкарыстоўваюць удалы момант”.

“Згодны з тымі, хто сьмяецца над сытуацыяй. Спэктакль, аналягічны таму, што быў ў канцы мінулага году па газе. Зноў пашумяць, уздымуць сабе рэйтынгі кожны ў сваёй краіне дый сьціхнуць”.

“Час рэфэрэндум прызначыць за ўваходжаньне ў Эўразьвяз”.

Блогер Яўген Ліпковіч піша сёньня ў сваім дзёньніку: “Калі аб’ектыўна падыходзіць да пытаньня пра тое, што ў нас адбываецца з забесьпячэньнем краіны энэрганосьбітамі, дык, адкінуўшы фальшывую сьціпласьць, варта заўважыць, што Аляксандар Рыгоравіч значна вырасьлі ў вачох усясьветнай супольнасьці. Калі раней яны садзілі ў турму Шарамета й грамадзяніна Беларусі, дык цяпер, несумненна ў іхнай асобе – якасныя зьмены. Векавая мара ўсяго прагрэсіўнага чалавецтва, што нарэшце расейцы атрымаюць сваё ад незалежнага правасудзьдзя, амаль зьдзейсьнілася… Канечне, ніхто не адступаў ад глябальнай мэты, ясна, дакладна й неаднаразова заяўленай – двума палкамі кінжальным ўдарам навесьці парадак у Лжэдзьмітрыеўску (гэтак блогер Ліпковіч звыкла называе Маскву – РС.), пазьбягаючы непатрэбных ахвяраў сярод мірнага насельніцтва. Але! Нікому не патрэбная пірава перамога. Няхай нават і тактычная”.

Дарэчы, уласны інтэрнэт-дзёньнік гэтымі днямі завёў і акадэмік Аляксандар Вайтовіч . Сярод запісаў у Жывым журнале спадара Вайтовіча можна знайсьці й такі: “Ці ведаеце вы, што за кошт сродкаў, якія неэфэктыўна былі затрачаныя на стварэньне спадарожніка “БелКА”, можна было:

– набыць сельскай гаспадарцы 1000 новых добрых трактараў;

– альбо рэалізаваць тры-пяць прарыўных, шостага ўкладу тэхналёгіяў;

– альбо мадэрнізаваць вытворчасьці на прадпрыемствах 7-10 малых гарадоў і даць новыя магчымасьці для разьвіцьця гэтых гарадоў і падвысіць дабрабыт іх жыхароў;

– альбо, альбо…

Чаму ж небагатая краіна гэтак неэфэктыўна выкарыстоўвае свае невялікія інвэстыцыйныя рэсурсы?”

Між тым у беларускім сеціве зьявіўся сайт прытулку для жывёлаў , які знаходзіцца ў Менску па вуліцы Гурскага,42. Тут можна знайсьці інфармацыю пра котак і сабакаў розных парод, якія шукаюць сваіх старых альбо новых гаспадароў. Апроч таго, аўтары сайту заклікаюць усіх неабыякавых дапамагчы насельнікам прытулку, якім патрэбныя мэдыкамэнты і харчы. Запрашаюць таксама й добраахвотнікаў, каб даглядаць жывёлаў.

Дасылайце свае ідэі ды спасылкі для “Начной аБЛОГі”, а таксама любыя іншыя прапановы, тэксты і гукі на электронны адрас NSvaboda@tut.by. Таксама тэлефануйце на менскі аўтаадказьнік 266-39-52 і дасылайце СМС-паведамленьні на нумар 391-22-24.
XS
SM
MD
LG