Лінкі ўнівэрсальнага доступу

Беларускія анархісты рэагуюць на адну з вэрсіяў КДБ


Старшыня КДБ Беларусі Вадзім Зайцаў 12 красавіка агучыў тры вэрсіі тэракту ў менскім мэтро. Адна зь іх – дачыненьне да выбуху маладых экстрэмістаў. "Ёсьць прадстаўнікі радыкальных моладзевых экстрэмісцкіх арганізацый. Цяпер завяршаецца крымінальная справа па анархістах. Мы не выключаем, што ў адплату, першую чаргу, у дачыненьні да КДБ маглі быць учынены падобныя дзеяньні", - сказаў Зайцаў.

На заяву Зайцава адрэагавала група анархістаў «Супраць дзяржавы, супраць капіталу!» на сайце Indymedia Belarus.

«Мы з упэўненасьцю можам сказаць, што анархісты ня маюць ніякага дачыненьня да гэтага масавага забойства. Мы гнеўна і рашуча асуджаем суб'ектаў, якія ажыцьцявілі гэты выбух.

Апанэнтам анархістаў зьяўляецца ўлада і яе прадстаўнікі. Прэзыдэнты, міністры, генэралы, гаспадары буйных прадпрыемстваў, а таксама жорсткія мянты, бессардэчныя пракуроры, баязьлівыя судзьдзі, прадажныя чыноўнікі, прагныя топ-менэджэры. Таксама нашымі супраціўнікамі зьяўляюцца нацысты - паталягічныя сэрыйныя маньякі-забойцы.

Людзі, якія спускаюцца пад зямлю, каб у перапоўненых вагонах даехаць да працы - гэта менавіта тыя, з кім анархісты салідарызуюцца і кім яны часьцяком зьяўляюцца. [...]

Варта таксама нагадаць, што беларускія анархісты, пра крымінальную справу якіх згадаў старшыня беларускага КДБ, абвінавачваюцца ў падпалах будынкаў: банку, апорнага пункту міліцыі, агароджы сьледчага ізалятару, гарадзкога аддзелу КДБ, праўладнай псэўда-прафсаюзнай арганізацыі. А таксама ў падпале аўтамашыны амбасады, узломе сайту гарадзкой адміністрацыі і ў недазволеным антываеннай шэсьці пад вокнамі беларускага генэральнага штабу. Усе падпалы былі зроблены глыбокай ноччу. Шкода людзям у выніку гэтых нападаў была выключаная. З гэтага бачна, што мэтамі нападаў беларускіх анархістаў, нават па дадзеных сьледзтва, зьяўляюцца зусім іншыя аб'екты, беларускія анархісты цэняць чалавечыя жыцьці і ня выкарыстоўваюць выбухоўку».
XS
SM
MD
LG