Лінкі ўнівэрсальнага доступу

Маладзёвая камісія Партыі БНФ "Моладзь БНФ" на сваім V зьезьде, які прайшоў 9 красавіка ў Менску, вырашыла скасаваць пасаду старшыні арганізацыі і дэлегаваць каардынацыйныя паўнамоцтвы радзе, што будзе зьбірацца кожны месяц.

У мерапрыемстве ўзялі ўдзел 26 дэлегатаў са сталіцы і рэгіёнаў. Першапачаткова колькасьць удзельнікаў мусіла быць 39, але частка дэлегатаў на зьезд не прыехалі. Апрача прадстаўнікоў лякальных суполак "Моладзі БНФ" на сустрэчы прысутнічала кіраўніцтва Партыі БНФ, а таксама госьці з украінскага "Нацыянальнага альянсу".

"Шмат хто да нас далучаецца ва ўзросце 27-28 гадоў, і за некалькі год яны не пасьпяваюць дарасьці, каб пачаць рабіць партыйную кар'еру. Таксама шмат хто хоча нейкага драйву і ўступае ў маладзёвую арганізацыю — мы ня можам чалавека не прыняць і адправіць у партыю", — адзначыў былы намесьнік старшыні "Моладзі БНФ", а зараз адзін з прадстаўнікоў рады камісіі Антон Каліноўскі. Але дэлегатамі была адхіленая папраўка аб павелічэньні ўзроставага парогу членаў маладзёвай камісіі Партыі БНФ да 33—35 гадоў.

Дэлегаты амаль аднагалосна прынялі рэзалюцыю "Аб салідарнасьці з палітзьняволенымі", у якой выказалі "гатоўнасьць рабіць усё магчымае для вызваленьня палітвязьняў, затрыманых беларускай міліцыяй і КДБ і прыцягнутых да крымінальнай адказнасьці па сфабрыкаванай справе аб масавых беспарадках 19 сьнежня". Тэкстам рэзалюцыі "Моладзь БНФ" зацьвердзіла, што арганізацыя гатовая "аказваць канкрэтную дапамогу ахвярам рэжыму ды іх сем'ям", а таксама "спрыяць прыцягванню да адказнасьці ўсіх прадстаўнікоў улады, якія праводзяць рэпрэсіўную палітыку рэжыму".

Удзельнікі зьезду таксама прынялі рэзалюцыю "Рукі прэч ад "Выспы Свабоды" ў цэнтры Менску!", у якой патрабуюць "неадкладнага скасаваньня палітычнага матываваньня рашэньня аб спыненьні арэнды памяшканьня", дзе знаходзіцца ўправа Партыі БНФ. У рэзалюцыі сьцьвярджаецца, што ўдзельнікі маладзёвай камісія Партыі БНФ гатовыя распачаць "бестэрміновую акцыю негвалтоўнага супраціву", калі арэнда памяшканьня ня будзе прадоўжана.

Паказаць камэнтары

XS
SM
MD
LG