Лінкі ўнівэрсальнага доступу

Канстытуцыйны суд засудзіў "Карту паляка"


7 красавіка на прапанову Палаты прадстаўнікоў Канстытуцыйны суд Беларусі прыняў рашэньне аб сваёй пазыцыі што да польскага закону "Аб Карце паляка".

Палата прадстаўнікоў зьвярнулася ў Канстытуцыйны суд, каб той ацаніў адпаведнасьць "карты паляка" агульнапрызнаным прынцыпам і нормам міжнароднага права.

Паводле Канстытуцыйнага суду, некаторыя нормы польскага закону ў справе вызначэньня правамоцтваў пэўных грамадзкіх аб'яднаньняў, якія зарэгістраваны ў Беларусі, на вырашэньне пытаньняў, зьвязаных з выдачай "карты паляка", "не адпавядаюць агульнапрызнаным прынцыпам сувэрэннай роўнасьці дзяржаў і неўмяшаньня ў справы, якія ўваходзяць ва ўнутраную кампэтэнцыю іншай дзяржавы".

Палажэньні закону, якія тычацца выдачы грамадзянам Беларусі "карты паляка" консулам Польшчы, не адпавядаюць палажэньням Венскай канвэнцыі аб консульскіх зносінах і беларуска-польскай консульскай канвэнцыі. Таксама яны парушаюць дамову паміж Беларусьсю і Польшчай аб добрасуседзтве.

Ільготны візавы рэжым і прывілеі пры працаўладкаваньні, якія дае "карта паляка", паводле Канстытуцыйнага суду, усталяваныя ў аднабаковым парадку і не адпавядаюць беларуска-польскаму пагадненьню аб узаемных паездках грамадзянаў, а таксама пагадненьню аб узаемным працаўладкаваньні грамадзянаў. Паводле суду, яны парушаюць агульнапрызнаны прынцып добрасумленнага выкананьня дзяржавамі абавязаньняў Дэклярацыі аб прынцыпах міжнароднага права.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG