Ірына Губская: "Затрымалі за бел-чырвона-белы шалік"

Пасьля затрыманьня на Дзень Волі 25 сакавіка выйшла на волю актывістка БХД Ірына Губская. Прэсавага сакратара Саньнікава Алеся Артошчанкава адправілі з турму на вуліцы Валадарскага ў калёнію, не дачакаўшыся касацыі. У справе 19 сьнежня яшчэ адзін абвінавачаны – Алег Гнедчык.

Увечары 28 сакавіка выйшла на волю з менскага ізалятару на вуліцы Акрэсьціна актывістка стваранай Партыі БХД Ірына Губская. Каб не дазволіць Губскай сустрэцца з сябрамі, якія чакалі яе каля ізалятару, міліцыянты вывезьлі дзяўчыну ў службовым аўтамабілі ў горад і там адпусьцілі. Ірына распавяла Свабодзе, што 25 сакавіка яе затрымалі на вуліцы, пабачыўшы на ёй бел-чырвона-белы шалік. У турме Губская абвясьціла сухую галадоўку, якую трымала да часу вызваленьня.

"Для мяне гэта была справа прынцыпу, бо затрымалі мяне незаконна, трымалі ва ўмовах, якія не адпавядаюць патрабаваньням да такіх ўстаноў, і пасьля гэтага хочуць яшчэ, каб я ім падпарадкоўвалася. Прыкладам, там адсутнічаюць элемэнтарныя матрацы, людзі сьпяць на дошках. Для мяне гэта быў шок. Гэта нельга замоўчваць. Альбо заяўлена радыё і тэлевізар, а нічога гэтага няма. Увогуле, карцэр нейкай эўрапейскай турмы, відаць, лепш за ізалятар часовага ўтрыманьня ў Менску".

Асудзілі Губскую 28 сакавіка раніцай ў судзе Савецкага раёну Менску. Справу разглядаў судзьдзя Дзьмітры Паўлючэнка.

28 сакавіка стала вядома, што абвінавачаньне ва ўдзеле ў масавых беспарадках 19 сьнежня выстаўленае Алегу Гнедчыку з Менска.У студзені Гнедчык правёў тры дні за кратамі. Тады ж ён быў дапытаны спецслужбамі ў якасці падазраванага. Зараз Алег Гнедчык знаходзіцца ў мінскім СІЗА па вуліцы Валадарскага, паведамляе праваабарончы цэнтар "Вясна".

Прэсавы сакратар былога кандыдата на прэзыдэнта Андрэя Саньнікава Алесь Атрошчанкаў, як мяркуе ягоная жонка Дар'я Корсак, ужо знаходзіцца ў калёніі "Віцьба-3" пад Віцебскам. Дар'я паведаміла Свабодзе:

"27-га мы панесьлі яму перадачу на Валадарскага, яле яе ўжо не прынялі. А па-другое, тады ж у суботу мне прыйшоў ліст, які ён напісаў у чацьвер, адразу, як яго прывезьлі на "Валадарку". І ён напісаў, што ўжо ведае, што ў пятніцу яго павязуць па этапе, хаця ня ведаў, куды. Напісаў, што яго добра прынялі ў камэры і ён вельмі рады, што зьехаў з ізалятару КДБ. І заўважыў, што пасьля трох месяцаў "амэрыканкі" "Валадарка" падаецца яму вакзалам. Магчыма, што людзей больш? Хаця заўважыў, што ў ягонай камэры не было шмат людзей. Мяркую, яны да апошняга трымалі яго ў КДБ, каб мы не пасьпелі зь ім сустрэцца на Валадарскага. Магчыма, ён зьбіраўся распавесьці пра катаваньні ў КДБ, таму яго адразу пад этап і перавялі."

Алесь Атрошчанкаў быў асуджаны 2 сакавіка на 4 гады зьняволеньня за удзел акцыі пратэсту 19 сьнежня. 5 красавіка адбудзецца разгляд касацыйнай скаргі Атрошчанкава на прысуд Фрунзенскага суду.