Сьвятлана Ціханоўская наведала Аахен, каб прыняць удзел у цырымоніі ўручэньня прэміі Карла Вялікага наступнаму ляўрэату.
Сама Ціханоўская — ляўрэатка гэтай прэміі 2022 году разам з Марыяй Калесьнікавай і Веранікай Цапкалай. Летась прэмію прысудзілі Ўладзіміру Зяленскаму і ўкраінскаму народу. А сёлета ёю ўганаравалі старшыню Канфэрэнцыі рабінаў Эўропы, былога галоўнага рабіна Масквы Пінхаса Гольдшміта за заслугі ў справе міжрэлігійнага дыялёгу.
Падчас цырымоніі ўручэньня прыза Сьвятлана Ціханоўская разам зь Веранікай Цапкалай і Тацянай Хоміч прысутнічалі на сцэне. Тацяна трымала ў руках фота Марыі Калесьнікавай, якая цяпер за кратамі.
На цырымоніі выступалі віцэ-канцлер Нямеччыны Робэрт Хабек, мэр Аахену Сібіла Кёйпэн, прэм'ер-міністар Альбаніі Эдзі Рама.
У сваёй прамове пры атрыманьні прэміі ляўрэат гэтага году Пінхас Гольдшміт аддаў увагу і Беларусі, выказаў падтрымку барацьбе беларусаў за свабоду сваёй краіны, назваў Ціханоўскую «абранай прэзыдэнткай», згадваў таксама Марыю Калесьнікаву.
Перад цырымоніяй у саборы адбылася традыцыйная малітва, дзе сярод іншага маліліся за беларускіх палітвязьняў. На сустрэчы зь віцэ-канцлерам Нямеччыны Хабекам Ціханоўская расказала пра гуманітарны фонд і неабходнасьць падтрымкі на рэабілітацыю палітвязьняў.
Што такое прэмія Карла Вялікага
З 1950 году грамадзянскі камітэт Аахену штогод уручае прэмію Карла Вялікага (Karlspreis) асобам, якія зрабілі вялікі ўнёсак у аб’яднаньне Эўропы. Традыцыйна прэмія ўручаецца на сьвята Ўзьнясеньня Гасподняга на цырымоніі ў Каранацыйнай залі ратушы Аахену.
Карл Вялікі — сярэднявечны імпэратар, які адыграў важную ролю ў аб’яднаньні Заходняй Эўропы.
Катэдральны сабор быў закладзены ў Аахене ў канцы VIII стагодзьдзя на распараджэньне Карла Вялікага. У ім каранаваліся імпэратары Сьвятое Рымскае імпэрыі.
Форум