У Службе аховы дзяржаўнай мяжы Літвы паведамілі пра павелічэньне чэргаў на мяжы зь Беларусьсю — выезду на беларускую тэрыторыю на двух дзейных літоўскіх памежных пунктах 22 красавіка чакалі 1710 грузавых аўтамабіляў і 410 легкавых.
«Мытнікі вельмі пільна правяраюць усе грузавікі, скануюць, плюс дакумэнты і ўсе іншае. І гэтая праверка займае столькі часу, колькі патрэбна, і гэта даволі доўга. Памежнікі правяраюць гэтыя дакумэнты за пару хвілін, у мытнікаў працэдуры, вядома, больш працяглыя», — сказаў прадстаўнік Службы аховы дзяржаўнай мяжы Літвы Гедрус Мішуціс у інтэрвію літоўскаму выданьню BNS.
Паводле яго, павелічэньне патоку зьвязана з узмацненьнем мытнага кантролю празь міжнародныя санкцыі супраць Расеі і Беларусі, а таксама зь Вялікаднем, які сёлета частка праваслаўных адзначае 5 траўня.
«Цяжка разьлічваць, што будзе лепш, калі засталіся толькі два памежныя пункты, якія прапускаюць аўтамабілі», — дадаў генэральны сакратар Нацыянальнай асацыяцыі аўтаперавозчыкаў Linava Вітаўтас Міленас. Ён зьвязвае павелічэньне чэргаў з праблемамі на мяжы Беларусі з Латвіяй і Польшчай, дзе засталося дзейных толькі па адным пункце пропуску.
Прадстаўніца паліцыі Віленскага павету Юлія Самаракоўская паведаміла, што з 1 сакавіка на памежны пункт у Салечніках каля 90 разоў выклікалі паліцыянтаў, а на Меднікі — 53. Паводле яе, каля траціны зваротаў былі зьвязаныя з канфліктамі паміж кіроўцамі, калі яны намагаліся хутчэй аб’ехаць чаргу з парушэньнем правілаў дарожнага руху з выездам на сустрэчную паласу.
Што кажуць беларускія памежнікі
На афіцыйным сайце Памежнага камітэту Беларусі паведамляюць, што выезду на літоўскую тэрыторыю чакаюць 1240 грузавікоў на двух пунктах пропуску і 100 легкавых аўтамабіляў.
У бок Польшчы ў чарзе на выезд зь Беларусі стаяць 500 грузавікоў і 280 легкавых аўтамабіляў, а ў бок Латвіі — 720 грузавікоў.
- 18 жніўня 2023 году Літва закрыла пункты пропуску Шумск (зь беларускага боку — Лоша) і Цверач (Відзы), 1 сакавіка 2024-га Лаварышкі (Катлоўка) і Райгорад (Прывалка). На мяжы зь Беларусьсю працягваюць працаваць два памежныя пераходы — Меднікі (Каменны Лог) і Салечнікі (Беняконі).
- Пасьля вынясеньня палітычна матываванага выраку журналісту, актывісту неафіцыйнага Саюза палякаў Беларусі Анджэю Пачобуту (8 гадоў зьняволеньня) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (зь беларускага боку Бераставіца).
- 19 верасьня 2023 года праз узрослую плынь нерэгулярных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).
