Унівэрсытэт Інсбруку правёў дасьледаваньне стаўленьня жыхароў Аўстрыі да магчымага нападу на краіну.
На пытаньне «Ў выпадку ўзброенага нападу на Аўстрыю, вы асабіста былі б гатовыя абараняць краіну са зброяй?» сьцьвярджальна адказалі толькі 14,21% жыхароў краіны. Пры гэтым людзей правых поглядаў, гатовых стаць на абарону краіны, больш за цэнтрыстаў і леваарыентаваных разам.
На пытаньне «Ў выпадку ваеннага нападу на Аўстрыю, ці павінны іншыя краіны-сябры Эўразьвязу падтрымаць Аўстрыю ваеннай дапамогай?» 72,28% лічаць, што так, павінны.
Пры гэтым на пытаньне «Ў выпадку ўзброенага нападу на іншую краіну ЭЗ, ці павінна Аўстрыя прыйсьці ёй на дапамогу войскамі?» толькі 13,58% лічаць, што сапраўды павінна.
Аўстрыйскі праект у вонкавай палітыцы (AFP3) — апытальны праект Унівэрсытэту Інсбруку ў супрацоўніцтве з Фэдэральным міністэрствам эўрапейскіх і міжнародных справаў. На мэце праекту стаіць вывучэньне адносін насельніцтва Аўстрыі ў галіне дзяржаўнай вонкавай палітыкі і палітыкі бясьпекі, а таксама міжнароднай палітыкі. Закранаецца шырокі спэктар тэмаў, такіх як палітыка бясьпекі, нэўтралітэт, зьнешні гандаль, міграцыя і рэпутацыя Аўстрыі ў сьвеце.
Праект апытаньня распрацаваны як доўгатэрміновае панэльнае дасьледаваньне, што азначае, што апытаньне праводзіцца штогод (так званымі «хвалямі»), каб мець магчымасьць фіксаваць разьвіцьцё і зьмены зь цягам часу.
У кожнай хвалі больш за 3000 аўстрыйцаў ва ўзросьце ад 18 гадоў адбіраюцца на аснове квотавай выбаркі і апытваюцца з дапамогай кампутарнага апытальніка (Computer-Assisted Web Interviews — CAWI).
Удзельнікі запісваліся з выкарыстаньнем скрыжаваных квотаў па ўзросьце і поле, а таксама простых квотаў для рэгіёну (дзяржавы) з мэтай дасягненьня рэпрэзэнтатыўнасьці колькасьці насельніцтва.
