Цяпер там ёсьць асобны сьпіс пад назвай «Злачынцы», хаця суду над большасьцю гэтых людзей не было і іх вінаватасьці ў нейкіх злачынствах не даказана, паведамляе Беларуская асацыяцыя журналістаў.
На стэндзе пра Зьмітра Лупача напісана, што ён «схаваўся ад сьледзтва», а таксама пазначаны артыкул 361-4 (ч. 1) Крымінальнага кодэксу («Вэрбаваньне, іншае ўцягваньне асобы ў экстрэмісцкую дзейнасьць, навучаньне і іншае садзеяньне экстрэмісцкай дзейнасьці»).
Зьміцер Лупач вымушана выехаў зь Беларусі пасьля шматлікіх выпадкаў адміністрацыйнага перасьледу за супрацоўніцтва зь незалежнымі СМІ. Перад ад’ездам у ліпені 2021 году яго затрымлівалі на тры дні ў межах крымінальнай справы, заведзенай за нібыта «распальваньне варожасьці». У сьнежні 2023 году сілавікі правялі ператрусы ў ягонай кватэры ў Глыбокім і ў вясковай хаце, якая дасталася Лупачу ў спадчыну.
Зьміцер Лупач не выключае, што ператрусы ў ягоным жыльлі маглі быць зьвязаныя з крымінальнай справай супраць стваральнікаў сюжэту тэлеканалу «Белсат», зьнятага ў Полацку, але пра тое, што яго вінавацяць у «садзеяньні экстрэмізму», яму нічога невядома. Позвы ў суд ён не атрымліваў, ніякіх афіцыйных зьвестак пра тое, што яго ўжо асудзілі завочна, няма, таму залічэньне ў шэраг «злачынцаў» ён лічыць паклёпам.
На гэтым самым стэндзе каля Глыбоцкага РАУС разьмясьцілі і фатаздымкі ягоных дзяцей — сына Валянціна і дачкі Кацярыны, якія цяпер таксама жывуць за мяжой. Пра Валянціна Лупача напісана, што ён нібыта ўхіляецца ад мерапрыемстваў па прызыве на вайсковую службу ( ч. 1 арт. 435 Крымінальнага кодэксу), пра Кацярыну Лупач — што яна «хаваецца ад сьледзтва» ў крымінальнай справе паводле ч. 1 «народнага» артыкулу 342 КК РБ (Арганізацыя і падрыхтоўка дзеяньняў, якія груба парушаюць грамадзкі парадак, або актыўны ўдзел у іх).
Старэйшую дачку Зьмітра Лупача Сьвятлану ўжо асудзілі паводле гэтага артыкулу, яна адбывае пакараньне ў гомельскай папраўчай калёніі № 4. Сёлета яе прозьвішча зьявілася ў «сьпісе экстрэмістаў» МУС. Правааабронцы прызналі яе палітзьняволенай.
У глыбоцкі «сьпіс злачынцаў», абвешчаных такімі без суду і сьледзтва, трапіла і Людміла Барэйка, якая прыдумала лёзунг «Стоп таракан». СК распачаў супраць яе «спэцвядзеньне», бо жанчына таксама была вымушаная зьехаць за мяжу.
