Стаў вядомы новы ляўрэат беларускай літаратурнай прэміі «Гліняны Вялес». Прэміяй за 2023 год узнагароджаны беларускі празаік Юры Станкевіч (пасьмяротна) за агульны ўнёсак у беларускую літаратуру, паведамляе «Радыё Рацыя».
Раней ніколі прэмія «Гліняны Вялес» не прысуджалася пасьмяротна.
«Гэтым разам мы вырашылі зрабіць выключэньне і ўшанаваць блізкага нам па творчых, маральных і жыцьцёвых перакананьнях празаіка Юрыя Станкевіча. Пісьменьніка ня стала ў 2021 годзе. Двойчы ягоныя кнігі намінаваліся на „Вялеса“. Ягоныя творы заўсёды былі з намі побач. Гэтым разам мы хочам выправіць ранейшую прыкрую памылку і ўшанаваць прэміяй Таварыства Вольных Літаратараў Юрыя Станкевіча», — кажа старшыня арганізацыйнага камітэту літаратурнай прэміі «Гліняны Вялес» Алесь Аркуш.
«Нам вельмі хацелася б, каб імя Юрыя Станкевіча было ў шэрагу нашых ляўрэатаў», — адзначаецца ў паведамленьні арганізацыйнага камітэту прэміі «Гліняны Вялес».
Пра Юрыя Станкевіча
Юры Станкевіч нарадзіўся 21 студзеня 1945 году ў Барысаве. Бацька пісьменьніка ў 1946 годзе быў рэпрэсаваны паводле 58-га артыкула Крымінальнага кодэксу і накіраваны ў Карагандзінскі папраўча-працоўны лягер. Юры рана пакінуў школу і пачаў працаваць. Пасьля заканчэньня факультэту журналістыкі Беларускага дзяржаўнага ўнівэрсытэту працаваў у «Барысаўскай аб’яднанай газэце». Неўзабаве пераехаў у Менск. Быў літаратурным супрацоўнікам, загадчыкам аддзелу часопіса «Маладосць», загадчыкам аддзелу часопіса «Крыніца». З 1990 году — сябра Саюзу беларускіх пісьменьнікаў.
Увайшоў у літаратуру ў 1988 годзе. Напісаў некалькі раманаў, шмат аповесьцяў і апавяданьняў, каля дзясятка п’ес і кінасцэнарыяў. Найважнейшыя кнігі: «Любіць ноч — права пацукоў» (1998), «Апладненьне ёлупа» (2005), «Мільярд удараў» (2008), «П’яўка» (2010). У большасьці сваіх твораў Станкевіч маляваў апакаліптычную карціну рэчаіснасьці, што чакае чалавецтва ў недалёкай будучыні.
Быў двойчы намінаваны на літаратурную прэмію «Гліняны Вялес» — за раман «Мільярд удараў» і раман «П’яўка».
«Гліняны Вялес» — найстарэйшая незалежная штогадовая беларуская літаратурная прэмія, заснаваная ў 1993 годзе сябрамі Таварыства Вольных Літаратараў. Старшыня арганізацыйнага камітэту — Алесь Аркуш. Прэмія прысуджаецца за лепшую мастацкую беларускамоўную кнігу году. Ляўрэат атрымлівае сымбалічную ўзнагароду — гліняны стод апекуна мастацтва.
У розныя гады ляўрэатамі прэміі станавіліся Алесь Разанаў, Уладзімер Някляеў, Уладзімер Арлоў, Андрэй Федарэнка, Віктар Казько, Сяргей Дубавец, Валянцін Акудовіч, Барыс Пятровіч, Артур Клінаў, Міхал Андрасюк, Наста Кудасава і іншыя. Стаць ляўрэатам прэміі можна толькі аднойчы.
«У чым была місія „Глінянага Вялеса“? Увогуле, для нас гэтая прэмія была інструмэнтам літаратурнага працэсу. Мы хацелі з дапамогай гэтай прэміі спрыяць зьяўленьню новай літаратуры, якая пачала нараджацца ў 1990-м годзе», — казаў раней Алесь Аркуш у інтэрвію Свабодзе.
