Сама меней 35 іншаземцаў сталі фігурантамі справаў, зьвязаных з палітыкай у Беларусі, падлічылі праваабаронцы «Вясны».
20 зь іх зьяўляюцца грамадзянамі Ўкраіны, сямёра маюць пашпарты Расеі. Праваабаронцы ўключылі ў гэты пералік і трох палякаў, двух латышоў, двух грамадзян Узбэкістана і аднаго грамадзяніна Казахстана.
«Дакладная колькасьць невядомая, але іх лік ідзе на трэці дзясятак. Іх перасьледуюць за ўдзел у акцыях пратэсту, камэнтары, перадачу інфармацыі незалежным СМІ і сваякам за мяжу. З пачаткам поўнамаштабнай вайны ва Ўкраіне ўзмацніўся ціск і перасьлед украінцаў у Беларусі — іх абвінавачваюць у «агентурнай дзейнасці» і «шпіянажы», — піша «Вясна».
На 5 красавіка праваабарончая супольнасьць Беларусі прызнала палітвязьнямі 1400 чалавек.
