Трэцяга красавіка новы склад Палаты прадстаўнікоў Нацыянальнага сходу Беларусі прыняў пастанову аб абраньні старшыняў сталых камісій, паведамляе прэс-служба палаты.
Сталыя камісіі пры Палаце прадстаўнікоў узначалілі дэпутаты:
- камісію па заканадаўстве — Марына Лянчэўская, дэпутатка, якая ініцыявала ўвядзеньне ў Беларусі пакараньня аж да сьмяротнага за спробы тэрарыстычнага акту, а падчас распрацоўкі новай рэдакцыі Канстытуцыі Беларусі актыўна выступала супраць нэўтральнага статусу Беларусі;
- камісію па нацыянальнай бясьпецы — Генадзь Ляпёшка, які раней быў начальнікам Вайсковай акадэміі,
- камісію па правах чалавека, нацыянальных адносінах і сродках масавай інфармацыі — Мікалай Бузін, палкоўнік, доктар вайсковых навук, раней быў у Генштабе намесьнікам начальніка па навуковай працы,
- камісію па бюджэце і фінансах — Васіль Панасюк, дэпутат Палаты прадстаўнікоў з 2019 году, раней быў намесьнікам старшыні сталай камісіі па прамысловасьці, паліўна-энэргетычным комплексе, транспарце і сувязі,
- камісію па эканамічнай палітыцы — Віктар Нікалайкін, былы старшыня Віцебскага гарвыканкаму (2009–2019), дэпутат Палаты прадстаўнікоў з 2019 году,
- камісію па адукацыі, культуры і навуцы — праўладны палітык і гісторык Ігар Марзалюк (займаў гэтую пасаду і ў папярэднім складзе Палаты прадстаўнікоў),
- камісію па аграрнай палітыцы — Іван Маркевіч, былы намесьнік старшыні Менскага аблвыканкаму,
- камісію па дзяржаўным будаўніцтве, мясцовым самакіраваньні і рэглямэнце — Валянцін Семяняка (займаў гэтую пасаду і ў папярэднім складзе Палаты прадстаўнікоў),
- камісію па міжнародных справах — дыплямат Сяргей Рачкоў,
- камісію па экалёгіі і прыродакарыстаньні — Жанна Чарняўская (займала гэтую пасаду і раней),
- камісію па працы і сацыяльных пытаньнях — Ірына Касьцевіч, былая міністарка працы і сацыяльнай абароны,
- камісію па ахове здароўя, фізычнай культуры, сямейнай і моладзевай палітыцы — Валер Малашка, былы міністар аховы здароўя,
- камісію па жыльлёвай палітыцы, гандлі і будаўніцтве — Юры Наркевіч, раней быў у камісіі па рэгіянальнай палітыцы і мясцовым самакіраваньні,
- камісію па прамысловасьці, паліўна-энэргетычным комплексе, транспарце і сувязі — Юры Панфілаў, раней ён узначальваў адзін з адміністрацыйных раёнаў Віцебску.
