Валерый Чайка займаў пасаду намесьніка кіраўніка раённага Цэнтру абслугоўваньня адукацыйных арганізацый. Ён загінуў на месцы.
У расейскім Сьледчым камітэце паведамілі, што распачалі крымінальную справу па факце падрыву машыны і гібелі чалавека.
Прызначаны Расеяй кіраўнік Старабельску Ўладзімір Чэрнеў у сваім тэлеграм-канале заявіў, што Чайка «стаяў ля вытокаў станаўленьня Старабельску пасьля вызваленьня ад украінскіх бандфармаваньняў».
Украінскі друк, паведамляючы аб выбуху, называе Чайку калябарантам. У 2010 годзе ён выбіраўся дэпутатам Старабельскага гарадзкога савету ад «Партыі рэгіёнаў» Віктара Януковіча. У 2022 годзе, пасьля поўнамаштабнага ўварваньня расейскіх войскаў у Луганскую вобласьць, перайшоў на іх бок і быў прызначаны расейскай адміністрацыяй дарадцам кіраўніка Старабельскага раёна рэгіёну.
Летась СБУ распачала супраць яго крымінальную справу па факце калябарацыйнай дзейнасьці. Абвінаваўчы акт у дачыненьні да Чайкі быў накіраваны ў суд, паведамляе «РБК-Украіна». Па гэтым абвінавачваньні яму пагражала да 15 гадоў пазбаўленьня волі.
Ва ўкраінскіх рэгіёнах, акупаваных расейскімі войскамі, пэрыядычна адбываюцца замахі на прадстаўнікоў прызначаных Расеяй адміністрацый. Шостага сакавіка ў Бярдзянску Запароскай вобласьці быў падарваны аўтамабіль сябра ўчастковай выбарчай камісіі. Уладальніца машыны загінула.
- 6 сьнежня летась у Луганску быў узарваны аўтамабіль дэпутата падкантрольнай расейскім уладам «Народнай рады Луганскай народнай рэспублікі» Алега Папова, ён загінуў.
- 8 лістапада ад выбуху загінуў дэпутат рэгіянальнага парлямэнту ў анэксаваным Луганску, былы кіраўнік узброеных сілаў прарасейскіх сэпаратыстаў Данбасу Міхаіл Філіпаненка.
- Забойства некамбатанта можа расцэньвацца як ваеннае злачынства. Расейскія ўлады абвінавачваюць у замахах украінскія спэцслужбы. Тыя адкрыта на сябе адказнасьць, часьцей за ўсё, не бяруць.
