У Службе бясьпекі Ўкраіны (СБУ) паведамілі аб завяршэньні дакумэнтаваньня «новых злачынстваў расейскай прапагандысткі Маргарыты Сіманьян», якая заклікала да масавага забойства ўкраінскіх дзяцей. Як адзначаецца ў паведамленьні СБУ, адпаведныя заявы кіраўніца тэлеканалу Russia Today зрабіла ў сьнежні 2023 году.
«Апроч гэтага, расейская прапагандыстка неаднаразова агітавала за прадаўжэньне ракетна-бомбавых удараў па цывільнай інфраструктуры Ўкраіны. Фігурантка рэгулярна пашырае крамлёўскія наратывы ў выглядзе „аўтарскіх“ публікацый на ўласным Telegram-канале і ў эфірах расейскіх тэлеканалаў», — паведамілі ў СБУ.
Крымінальную справу супраць Маргарыты Сіманьнян завялі паводле чатырох артыкулаў Крымінальнага кодэксу Ўкраіны — ч. 2 артыкулу 442 (генацыд), ч. 2 артыкулу 110 (замах на тэрытарыяльную цэласнасьці), артыкулу 436 (прапаганда вайны), ч. 3 артыкулу 436-2 (апраўданьне і прызнаньне правамернай узброеную агрэсію Расеі супраць Украіны, праслаўленьне яе ўдзельнікаў).
За такія злачынствы ва Ўкраіне прадугледжваецца пакараньне ў выглядзе пазбаўленьня волі ад 3 да 10 гадоў з або без канфіскацыі маёмасьці.
