Міністар замежных справаў Літвы Габрыелюс Ландсбергіс заявіў, што забарона ўладаў Беларусі на пастаўкі шэрагу відаў прадукцыі зь Літвы — гэта санкцыі супраць беларускага народу.
«Санкцыі наклалі супраць самых сябе. Інакш я гэта назваць не магу. [...] Гэта санкцыі супраць уласнага народу», — сказаў Габрыелюс Ландсбергіс выданьню BNS.
Паводле яго, Літва пастаўляла ў Беларусь невялікія аб’ёмы прадукцыі. Міністар мяркуе, што адмова ўладаў Беларусі ад літоўскай прадукцыі будзе спрыяць дывэрсыфікацыі дзейнасьці бізнэсоўцаў Літвы, якія супрацоўнічалі зь Беларусьсю.
«Для нашай эканомікі, хоць яна і невялікая, гэта будзе садзейнічаць дывэрсыфікацыі. То бок нават тыя невялікія групы тавараў, якія раней прадавалі ў Беларусь, мы будзем накіроўваць у іншыя краіны», — патлумачыў ён.
Старшыня камісіі замежных справаў Сейму Жыгімантас Павілёніс мяркуе, што рашэньне ўладаў Беларусі паўплывае і на расейскі рынак.
«Беларусь была месцам, празь якое Расея абыходзіць санкцыі. Мы самі ня раз падымалі пытаньне аб неабходнасьці ўзмацніць санкцыі супраць Беларусі, каб Расея не магла гэтыя санкцыі абысьці», — сказаў дэпутат.
15 сакавіка стала вядома, што ўрад Беларусі ў адказ на рашэньне Літвы закрыць яшчэ два памежныя пункты забараніў увозіць зь Літвы мінэральную ваду, піва, віно, вінаграднае сусла, вэрмуты, напоі іншыя зброджаныя, этылавы сьпірытус , воцат, апоны і покрыўкі пнэўматычныя гумовыя, адзеньне і іншыя ўжываныя вырабы, а таксама ўжываныя часткі і прыналежнасьці транспартных сродкаў.
1 сакавіка Літва закрыла два пункты пропуску на мяжы зь Беларусьсю — «Райгорад» і «Лаварышкі».
Згодна з гандлёвай статыстыкай, апублікаванай Дэпартамэнтам эканамічных і сацыяльных пытаньняў ААН, экспарт Беларусі ў Літву ў 2023 годзе склаў 302 мільёны даляраў, а пастаўкі зь Літвы ў Беларусь — 1,84 мільярда даляраў.
