Губэрнатар вобласьці Вячаслаў Гладкоў напісаў, што ў будынак адміністрацыі гораду ўрэзаўся дрон.
«Ёсьць двое пацярпелых: адна жанчына атрымала асколачныя раненьні, другая — кантузію. Пацярпелым аказваецца ўся неабходная мэдычная дапамога. У выніку выбуху ў будынку выбітыя вокны, пасечаны фасад», — паведаміў ён.
Пазьней мэр Белгараду Валянцін Дзямідаў удакладніў, што пацярпелі чатыры чалавекі. Паводле яго, яны атрымалі «нязначныя раненьні».
Гладкоў раней паведамляў, што дрон урэзаўся ў сьцяну крамы ў Белгарадзе. Ад выбуху ў будынку выбіла вокны і пасекла фасад, пацярпелі чатыры легкавыя аўтамабілі. Яшчэ адзін дрон упаў на дах гандлёвага цэнтру ў раёне чыгуначнага вакзалу. Пра пацярпелых не паведамляюць.
Бесьпілётнікі атакуюць горад, зь перапынкамі, з раніцы. У рэгіёне, каля мяжы з Украінай, ішлі баі з добраахвотніцкімі падразьдзяленьнямі, якія ваююць на баку Кіева. Прадстаўнікі падразьдзяленьняў сьцьвярджаюць, што перайшлі мяжу і замацаваліся на тэрыторыі Расеі. Расейскія ўлады і вайскоўцы гэта адмаўляюць.
За паўдня дзесяць рэгіёнаў Расеі зазналі атакі дронаў. Раніцай над Белгарадзкай вобласьцю таксама былі зьбітыя ракеты. Пра гэта паведаміла Мінабароны Расеі.
