У Маскве, Санкт-Пецярбургу, Екацерынбургу, Ніжнім Ноўгарадзе і Ўльянаўску праводзяць ператрусы ў мясцовых мастакоў. Яны могуць быць зьвязаныя з справай аб дзяржаўнай здрадзе, якую завялі супраць удзельніка гурту Pussy Riot і былога выдаўца «Медиазоны» Пятра Вярзілава. Пра гэта паведамляюць «Сетевые свободы».
У Санкт-Пецярбургу супрацоўнікі ФСБ прыйшлі да мастачкі Катрын Нянашавай і яе сяброўкі Наташы Чэтверыё. У іхнай кватэры правялі ператрус, пасьля чаго Нянашаву павезьлі на допыт на машыне без нумароў, піша «ОВД-Инфо». Чэтверыё, якую на допыт не забралі, сказала, што Нянашава праходзіць сьведкай у справе аб дзяржаўнай здрадзе.
Таксама ператрусы ідуць ува ўдзельнікаў арт-групы «Ява», ва ўдзельніцы Pussy Riot Рыты Флорэс і мастака Сашы Блота.
У Маскве з кватэры павезлі знаёмую мастака Philippenzo — сувязі зь ёю няма. У Екацерынбургу пасьля ператрусу забралі на допыт мастака Ільлю Мазгі, у Ніжнім Ноўгарадзе — мастака Арцёма Філатава, ва Ўльянаўску — мастака Ільлю Холтава.
Таксама ператрус праходзіць у маці Пятра Вярзілава. Як мінімум частка ператрусаў санкцыянаваная Лефортаўскім судом Масквы.
- Пётар Вярзілаў, грамадзянін Расеі і Канады, зьехаў з Масквы ў 2020 годзе. У кастрычніку 2023 году Вярзілаў расказаў у інтэрвію Юрыю Дудзю, што як мінімум з 2022 году служыць ува ўкраінскім войску.
- 11 сакавіка, Маскоўскі гарадзкі суд адправіў на перагляд справу Вярзілава паводле артыкулу аб дэзынфармацыі пра расейскае войска. Яго раней асудзілі на 8,5 года калёніі за допісы аб забойствах у Бучы.
- Ілжывай інфармацыяй пра войска расейскія суды прызнаюць паведамленьні аб вайне ва Ўкраіне, якія не супадаюць з вэрсіяй Міністэрства абароны Расеі.
