Паводле зьвестак праваабаронцаў, Дземчанка памёр у сьледчым ізалятары ў Растоўскай вобласьці.
Агенцтву ТАСС у Паўднёвым акруговым ваенным судзе ў Растове-на-Доне пацьвердзілі сьмерць арыштаванага. Паводле крыніцы ТАСС, Дземчанка памёр 31 сьнежня ад наступстваў інсульту.
«Мемориал» зьвяртае ўвагу на тое, што пра справу Дземчанкі вядома вельмі мала. Ён нарадзіўся ў 1952 годзе ў горадзе Мосьпіна, які ў 2014 годзе перайшоў пад кантроль сэпаратыстаў так званай «ДНР». Ці ёсьць у яго блізкія сваякі і на якой тэрыторыі — невядома.
У месцах зьняволеньня ў Расеі знаходзіцца шмат грамадзян Украіны, якіх сілком вывезьлі на тэрыторыю Расеі. Праваабаронцы зазначаюць, што ў многіх выпадках месцазнаходжаньне зьняволеных адсачыць немагчыма.
