У палітыцы Валера Мацкевіча ведаюць з 1999 году. У свой час ён быў намесьнікам старшыні моладзевай арганізацыі «Малады фронт».
Як піша прэсавая служба АПК, Мацкевіч мае досьвед супрацоўніцтва зь міжнароднымі арганізацыямі і палітычнымі структурамі. Быў каардынатарам мабілізацыйных кампаній падчас прэзыдэнцкіх выбараў 2001, 2006, 2010 гадоў. У 2007 годзе балятаваўся ў мясцовы савет дэпутатаў.
Падчас перадвыбарнай кампаніі 2020 году кіраваў адной са стратэгічна-аналітычных груп у аб’яднаным штабе Сьвятланы Ціханоўскай. Адразу пасьля выбараў прайшоў праз жодзінскую турму і ізалятар на Акрэсьціна.
Зьяўляецца сябрам Каардынацыйнай рады ад пачатку яе стварэньня, з восені 2020 году.
Валер Мацкевіч пракамэнтаваў сваё прызначэньне:
«Перад Кабінэтам як асноўным выканаўчым органам дэмакратычных сіл Беларусі стаіць вельмі адказная задача ў рэалізацыі стратэгіі, якая мусіць забясьпечыць набліжэньне транзыту ўлады ад злачыннага рэжыму да законнай і дэмакратычнай улады».
Мацкевіч прызнаў, што кабінэт фактычна ўсё больш выконвае ролю альтэрнатыўнага ўраду, вядзе распрацоўку такіх глябальных і сацыяльна значных праектаў, як нацыянальны пашпарт, ці, напрыклад, інфармацыйна-кансультацыйная служба „Адно акно“.
«Як кіраўнік апарату я бачу сваёй асноўнай місіяй арганізацыю працы Кабінэта як зладжанага мэханізму, які мае супольныя прыярытэты і адзіную мэту — незалежную дэмакратычную Беларусь без палітзьняволеных і зь легітымнай уладай».
Што такое Аб’яднаны пераходны кабінэт Беларусі
На канфэрэнцыі «Новая Беларусь» у Вільні 9–10 жніўня Сьвятлана Ціханоўская заявіла аб стварэньні Аб'яднанага пераходнага кабінэту, які будзе працаваць на галоўныя мэты:
- Абараняць незалежнасьць і сувэрэнітэт Рэспублікі Беларусь, прадстаўляць нацыянальныя інтарэсы Беларусі. Ажыцьцявіць фактычную дэакупацыю Беларусі.
- Аднавіць канстытуцыйную законнасьць і правапарадак.
- Распрацаваць і рэалізаваць меры па спыненьні незаконнага ўтрыманьня ўлады, забясьпечыць транзыт улады ад дыктатуры да дэмакратыі, стварыць умовы для правядзеньня сумленных і свабодных выбараў.
- Распрацоўваць і выконваць рашэньні, неабходныя для дасягненьня дэмакратычных перамен у Беларусі.
- І ў выніку гэтага павінны быць вызваленыя ўсе палітвязьні.
У складзе Кабінэту пад кіраўніцтвам Ціханоўскай сярод іншых працуюць:
- Павал Латушка — прадстаўнік Кабінэту па транзыце ўлады;
- Аляксандар Азараў — па аднаўленьні правапарадку;
- Валер Кавалеўскі — па замежных справах;
- Валер Сахашчык — па абароне і нацыянальнай бясьпецы;
- Вольга Гарбунова — прадстаўніца ў сацыяльных пытаньнях;
- Аліна Коўшык — прадстаўніца па нацыянальным адраджэньні.
Аб’яднаны пераходны кабінэт Ціханоўскай заявіў, што пачынае рыхтаваць беларусаў да старту пляну «Перамога».
Аб’яднаны пераходны кабінэт патрабуе і будзе дабівацца безумоўнага вываду ўзброеных сіл Расейскай Фэдэрацыі з тэрыторыі Беларусі.
Аб’яднаны пераходны кабінэт заснаваў Місію дэмакратычнай Беларусі ў Брусэлі і накіраваў свайго прадстаўніка ў Кіеў.