Паводле ведамства, СК разам зь міліцыяй працягваюць праглядаць відэазапісы, зробленыя ў гарадах Беларусі падчас пратэстаў 2020 году, для пошуку іх удзельнікаў і прыцягненьня іх да адказнасьці.
Такім чынам яны апазналі і затрымалі 50-гадовую жыхарку Берасьця, якая ўдзельнічала ў акцыі пратэсту ў абласным цэнтры. Ёй ставяць у віну арт.342 (арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх) Крымінальнага кодэксу, паводле якога ёй пагражае да 4 гадоў пазбаўленьня волі.
- 13 верасьня 2020 году ў Берасьці ўдзельнікі акцыі пратэсту супраць фальсыфікацыі вынікаў прэзыдэнцкіх выбараў перакрылі рух транспарту на скрыжаваньні бульвараў Касманаўтаў і Шаўчэнка з праспэктам Машэрава, сьпявалі песьні і вадзілі карагоды. Тады ўдзельнікаў акцыі разагналі з дапамогай вадамётаў, а неўзабаве адкрылі крымінальную справу, якую мясцовыя называюць «карагоднай».
- «Кагародная справа» ўжо стала самай масавай у гісторыі Беларусі крымінальнай справай. Праваабаронцы падлічылі, што асуджаныя атрымалі сумарна сама меней 125 гадоў «хатняй хіміі», 90,5 года абмежаваньня волі з накіраваньнем у папраўчую ўстанову, 13 гадоў і 8 месяцаў калёніі.
