Пра справу Аляксандра Буракова піша тэлеграм-канал праваабаронцаў Mayday Team.
Ідзецца пра інцыдэнт 16 верасьня 2014 году. У той дзень сямёра міліцыянтаў пад кіраўніцтвам маёра Пугачова ўварваліся ў кватэру журналіста і правялі там ператрус, назваўшы яго «аглядам месца правапарушэньня». Аляксандра Буракова абвінавацілі ў парушэньні закону аб СМІ — нібыта ён працуе на нямецкую мэдыякампанію Deutsche Welle без акрэдытацыі.
На Буракова склалі адміністрацыйны пратакол і аштрафавалі на 500 эўра.
У адказ журналіст абскардзіў рашэньне суду і ў 2015 годзе падаў скаргу ў КПЧ ААН. Істоту справы, як выявілася, разглядалі яшчэ на 131-й сэсіі Камітэту ў сакавіку 2021 году. У рашэньні ад 18 траўня 2021 году Камітэт прыйшоў да высновы, што правы журналіста былі парушаныя, а дзяржава адпаведна палажэньням Міжнароднага пакту аб грамадзянскіх і палітычных правах абавязана даць яму эфэктыўны сродак праўнай абароны. Дзяржава таксама мусіла даць журналісту адэкватную кампэнсацыю і пакрыць выдаткі, у тым ліку штраф і судовыя выдаткі. Акрамя таго, патрабавалася прыняць захады для недапушчэньня такіх парушэньняў у будучыні.
Аднак рашэньне прынялі ў момант, калі журналіст адбываў 20-дзённы арышт пасьля незаконнага затрыманьня напярэдадні судовага паседжаньня ў справе Паўла Севярынца ў траўні 2021 году. А яшчэ празь месяц Аляксандар Буракоў, які праходзіў сьведкам у крымінальнай справе супраць ПЦ «Вясна», вымушаны быў пакінуць Беларусь. Таму ён ня ведаў пра рашэньне КПЧ ААН.
Вядома, што апошнія два гады Буракоў працаваў карэспандэнтам на Паўднёвым Каўказе.
Уладзімер Пугачоў за гэты час даслужыўся да званьня падпалкоўніка і пасады намесьніка начальніка Кастрычніцкага РАУС Магілёва — начальніка міліцыі грамадзкай бясьпекі. У траўні 2020 году ён быў яшчэ маёрам і адыграў адну з ключавых роляў пры затрыманьні картэжу Сяргея Ціханоўскага ў Магілёве.
Рашэньне ў справе Аляксандра Буракова ў базе зьвестак ААН адшукаў палітвязень і экспэрт у працы з КПЧ ААН Леанід Судаленка, які нядаўна вызваліўся з турмы і вымушана пакінуў краіну.
У кастрычніку 2022 году рэжым Лукашэнкі дэнансаваў факультатыўны пратакол да Міжнароднага пакту аб грамадзянскіх і палітычных правах. Цяпер беларусы ўжо ня могуць зьвяртацца з скаргамі аб парушэньні сваіх правоў у КПЧ ААН.
