Нядаўна скончыўся конкурс «Міс Беларусь», і некаторыя прапагандысцкія рэсурсы аддаюць яму вельмі шмат увагі. Самі па сабе такія конкурсы — адгалосак тых часоў, калі галоўная задача жанчыны была радаваць мужчынскае вока, але ёсьць і другое — больш спэцыфічнае адценьне ў гэтай драме. Конкурсы прыгажосьці ў Беларусі — гэта адбор у эскорт Лукашэнкі.
Беларускі на подыюме павінны цешыць сваім выглядам не мужчын у цэлым, а канкрэтнага чалавека, які лічыць сябе экспэртам ня толькі ў дзяржаўным кіраваньні, эпідэміялёгіі, жывёлагадоўлі і хакеі, але таксама і ў жаночай прыгажосьці. Ён прысутнічае на фінале «Міс Беларусь», і прапагандысцкае мэдыя АНТ фактычна піша, што спадабацца яму — самае важнае для ўдзельніц: «З залі за фіналам сачыў і Аляксандар Лукашэнка. Большы ўзровень адказнасьці і хваляваньня ўявіць, здаецца, немагчыма».
Мы так звыклі да абсурднага і жахлівага тэрору ў Беларусі, што такая дэталь, як наведваньне фактычным кіраўніком краіны конкурсу прыгажосьці, можа застацца незаўважанай праз сваю нібыта нязначнасьць. Але гэта яшчэ адна важная ілюстрацыя таго, што такое гэты рэжым і на якіх каштоўнасьцях ён стаіць.
Лукашэнка прыходзіць на конкурс як на кірмаш, дзе можна выбраць самы сьвежы і прыгожы кавалак мяса ці раўнейшую бульбу. Чакаць у такіх абставінах, што ў краіне ў цэлым будзе паважлівае стаўленьне да жанчын, было б наіўна. Бо калі Лукашэнка прыглядаецца да «тавару» і не саромеецца рабіць гэта публічна, дык ні пра якую роўнасьць і павагу гаворкі ісьці ня можа.
Але цікава ня толькі тое, што ў Лукашэнкі ёсьць эскорт-служба, у якую фактычна вэрбуюць маладых дзяўчат мадэльнай зьнешнасьці. Гэта, па-першае, не навіна, а па-другое, наіўна было б думаць, што яго стаўленьне да жанчын можна неяк палепшыцца.
Куды цікавей, ці сыдзе гэтае сярэднявечча разам з Лукашэнкам. Нам вельмі патрэбная новая, дэмакратычная Беларусь, у якой ва ўсіх будуць адэкватныя магчымасьці для самаразьвіцьця і дзе нікому ня трэба будзе рабіць выбар — ісьці ў эскорт да мужчыны на высокай пасадзе ці рызыкаваць кар’ерай. Але для гэтага мала проста замяніць Лукашэнку на іншага чалавека. Для гэтага трэба, каб новы чалавек меў адпаведныя каштоўнасьці і глядзеў на жанчын як на паўнавартасных людзей.
Такім чынам, пакуль Лукашэнка ва ўладзе, конкурсы прыгажосьці і зьвязаны зь імі эскорт дакладна нікуды ня зьнікнуць, але і пасьля яго сыходу няма гарантый, што будзе лепей. Зрэшты, гэта і ёсьць наша задача — зрабіць так, каб стала лепей. І каб дзяўчаты, плянуючы будучыню, ня мелі прычынаў азірацца на сэксуальныя перавагі статусных мужчын.
Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.
