Колькасьць расейскіх турыстаў, якія са студзеня па травень 2023 году наведалі Беларусь, у параўнаньні з аналягічным пэрыядам летась вырасла на 173%, заявіла ТАСС дырэктарка дэпартамэнту па турызьме Міністэрства спорту і турызму Беларусі Ірына Варановіч.
Паводле яе, на сёньня ў беларускіх санаторыях знаходзяцца 5000 грамадзян Расеі, напаўняльнасьць санаторыяў складае 91%. Акрамя санаторна-курортнага адпачынку, расейцаў, паводле Варановіч, цікавіць аграэкатурызм, а таксама прамысловы турызм (экскурсіі і туры на прамысловыя аб’екты).
Паводле Варановіч, у Беларусь прыяжджаюць ня толькі з буйных гарадоў, напрыклад, Масквы і Санкт-Пецярбургу.
Раней намесьнік міністра спорту і турызму Беларусі Алег Андрэйчык паведаміў, што ў 2022 годзе з агульнай колькасьці турыстаў, якія наведалі Беларусь, расейцы склалі 96%.
У 2022 годзе ў беларускіх гатэлях зарэгістравалі 540 тысяч расейцаў, у 2021 годзе — 200 тысяч.
- 19 верасьня 2022 году суседзі Беларусі Літва, Латвія, Эстонія і Польшча закрылі межы для расейскіх турыстаў.
- Шэраг краінаў Эўразьвязу перасталі выдаваць расейцам турыстычныя візы. Агулам краіны ЭЗ не дамовіліся аб поўнай забароне выдачы візаў расейскім турыстам, але пагадзіліся, што гэтае пытаньне можа вырашацца «на нацыянальным узроўні».
