Журналіста Пачобута перавялі ў наваполацкую калёнію
Палітвязьня абвінавацілі паводле арт. 361 КК — заклікі да дзеяньняў, накіраваных на прычыненьне шкоды нацыянальнай бясьпецы Рэспублікі Беларусь, і арт. 130 КК — распальваньне расавай, нацыянальнай, рэлігійнай альбо іншай сацыяльнай варожасьці. Справу ў Горадзенскім абласным судзе ў закрытым рэжыме разглядаў судзьдзя Дзьмітры Бубенчык. У лютым Пачобуту прысудзілі 8 гадоў калёніі. Нядаўна журналіст атрымаў намінацыю на «Майстра польскай мовы» і ляўры Акадэміі майстроў польскай мовы.
Вярхоўны суд 26 траўня разгледзеў апэляцыйную скаргу палітвязьня. Судзьдзя Ігар Любавіцкі пакінуў прысуд Пачобуту бязь зьменаў, а скаргу — без задавальненьня.
Як стала вядома праваабаронцам, адбываць тэрмін Пачобута накіравалі ў наваполацкую калёнію № 1.
Журналісту Сяргею Сацуку дазволілі ў калёніі атрымліваць неабходныя лекі
Днямі сваякі асуджанага на 8 гадоў зьняволеньня рэдактара інтэрнэт-выданьня «Ежедневник» Сяргея Сацука мелі зь ім плянавую сустрэчу ў папраўчай калёніі №15 Магілёва, піша БАЖ. Так даведаліся, што нарэшце ў Сацука вырашылася пытаньне з доступам да неабходных кардыялягічных прэпаратаў.
Сяргей Сацук мае даўнія праблемы з сэрцам, яму пажыцьцёва прапісана прымаць пэўныя лекі. Аднак яшчэ ў сьледчых ізалятарах Менску, а потым і турмы № 4 Магілёва прадстаўнікі адміністрацый адмаўлялі арыштанту ў перадачы яму рэцэптурных прэпаратаў.
У калёніі цяпер такой праблемы няма, доступ да неабходных лекаў забясьпечаны. Аднак, як адзначае БАЖ, гэта не азначае, што фізычны стан вязьня ў такіх умовах можна назваць больш-менш прымальным — сардэчныя болі, арытмія вяртаюцца штодня. Адпаведна, патрабуецца сур’ёзнае абсьледаваньне з стацыянарным доглядам.
Адзінае, у чым кіраўніцтва папраўчай установы пайшло насустрач хвораму, — перавяло яго на лягчэйшую працу. Як пажартаваў у лісьце Сяргей Сацук, цяпер ён «працуе бамжом» — двойчы на тыдзень перабірае і сартуе сьмецьце. Але прынамсі такая нагрузка куды больш бясьпечная, чым цягаць мэталалом.
