У Ваўкавыску АМАП затрымаў ахоўніка «Эўраопту»
У Ваўкавыску сілавікі затрымалі мужчыну, які, як сьцьвярджаецца, працуе ахоўнікам у адной з крамаў «Эўраопту». Відэа затрыманьня зьявілася ў праўладных тэлеграм-каналах. Як сьцьвярджаецца, для затрыманьня мужчыны прыцягвалі супрацоўнікаў АМАП.
Як даведалася «Наша Ніва», затрыманым аказаўся 39-гадовы жыхар Ваўкавыска Міхаіл Данілевіч.
Сілавікі сьцьвярджаюць, што мужчына «на працоўным месцы» нэгатыўна адгукаўся пра сваё кіраўніцтва і «пакідаў дрэнныя водгукі на расейскія і беларускія тавары», а таксама «дрэнныя водгукі на расейскіх вайскоўцаў, якія сёньня ваююць ва Ўкраіне». Яшчэ адзін пункт абвінавачаньня — «распаўсюд экстрэмісцкіх матэрыялаў». За гэта Міхаіла затрымалі.
Самі паведамленьні на кадрах не дэманструюць.
У Гомлі затрымалі сама меней 5 чалавек
Відэа з затрыманымі зьявілася ў Тэлеграм-канале, блізкім да сілавікоў, паведамляе «Гомельская Вясна». На відэа — чацьвёра мужчын і адна жанчына, усе затрыманыя кажуць, што былі падпісаныя на «экстрэмісцкія» рэсурсы.
