Ужо сёньня: Дзень салідарнасьці з палітвязьнямі Беларусі; гадавіна гібелі Вітольда Ашурка

Дата дня

21 траўня 2021 году ў шклоўскай калёніі пры нявысьветленых абставінах загінуў 50-гадовы палітвязень і актывіст Вітольд Ашурак.

Праваабарончы цэнтар «Вясна» заклікае 21 траўня выказаць салідарнасьць з усімі палітвязьнямі Беларусі, прыцягнуць увагу беларускага і міжнароднага грамадзтва да іх праблемаў і чарговы раз запатрабаваць ад уладаў вызваленьня ўсіх палітзьняволеных.

Беларусы сьвету правядуць акцыі ў Дзень салідарнасьці з палітвязьнямі Беларусі, які абвешчаны 21 траўня, у гадавіну сьмерці Вітольда Ашурка.

ГЛЯДЗІЦЕ ТАКСАМА:

Апублікавалі расклад акцый салідарнасьці зь беларускімі палітвязьнямі 19–21 траўня

Таксама ў гэты дзень

1794 — загадам Тадэвуша Касьцюшкі ўтворана Найвышэйшая нацыянальная рада Рэчы Паспалітай — галоўны заканадаўчы і адміністрацыйна-выканаўчы орган паўстаньня 1794 году.

1804 — у Парыжы адкрыліся могілкі Пэр-Ляшэз, на якіх пазьней былі пахаваныя і дзеячы беларускай эміграцыі, у тым ліку прэзыдэнт Рады БНР Мікола Абрамчык.

1864 — Расея абвяшчае канец расейска-чаркескай вайны, у выніку якой шмат чаркесаў пакінулі свой паняволены край. 21 траўня адзначаецца сярод чаркесаў як Дзень жалобы.

1900— Расейская імпэрыя анэксавала Маньчжурыю.

1904 — заснаваная Міжнародная фэдэрацыя футболу (FIFA).

1944 — на плебісцыце ў Ісьляндыі жыхары вострава падтрымалі рашэньне парлямэнту аб аддзяленьні ад Даніі. Незалежнасьць краіны была абвешчаная 17 чэрвеня.

1982 — Фолклэндзкая вайна: Вялікая Брытанія пачала высадку марскога дэсанту на Фолклэндах.

1991 — Вярхоўны Савет БССР адмаўляецца ўнесьці ў парадак дня сэсіі прапанову Апазыцыі БНФ аб абвяшчэньні незалежнасьці — наданьні Дэклярацыі аб дзяржаўным сувэрэнітэце статусу канстытуцыйнага закону. Праз два месяцы прапанова будзе прынятая.

2006 — У Чарнагорыі праведзены рэфэрэндум аб яе дзяржаўнай самастойнасьці.

У гэты дзень нарадзіліся

1894 — Мікалай Галадзед, беларускі камуністычны дзяяч.

1898 — Канстанцін Кіслы, беларускі музыкант, кампазытар, дырыжор.

1921 году — Андрэй Сахараў, савецкі дысыдэнт і праваабаронца, акадэмік, фізык, адзін са стваральнікаў савецкай вадароднай бомбы.

1939 — Валянціна Петрачкова, беларуская актрыса.

У памяці

1960 — Юры Рэрых, расейскі ўсходазнаўца, лінгвіст, філёляг, мастацтвазнаўца, этнограф, падарожнік, прафэсар, дырэктар Інстытуту гімалайскіх дасьледаваньняў «Урусваці».

1983 — мітрапаліт Андрэй (Аляксандар Крыт), рэлігійны дзеяч беларускай эміграцыі.