31 студзеня ў Менскім гарадскім судзе разгледзелі касацыйную скаргу лідэра АГП Мікалая Казлова, экс-намесьніцы старшыні АГП Антаніны Кавалёвай і лідэра Менскай гарадзкой арганізацыі Аксаны Аляксеевай.
Судзьдзя Брысіна пакінула вырак безь зьмяненьня, паведаміла прэсавая служба АГП.
Трэцяга лістапада суд Першамайскага раёну Менску вынес выракі траім прадстаўнікам Аб’яднанай грамадзянскай партыі:
- Мікалаю Казлову — 2,5 года калёніі,
- Аксане Аляксеевай — 1,5 года калёніі,
- Антаніне Кавалёвай —1 год калёніі.
Раней стала вядома, што палітзьняволеных Антаніну Кавалёву, Аксану Аляксееву і Дзіяну Чарнушыну перавялі ў СІЗА-3 у Гомлі, паведамляе прэс-служба АГП. Андрусь Асмалоўскі — у СІЗА-6 у Баранавічах.
Лідэр партыі АГП Мікалай Казлоў увязьнены ў сьледчай турме № 4 у Магілёве. Артур Смалякоў — у СІЗА-2 у Віцебску.
31 кастрычніка вынесьлі прысуды Артуру Смалякову і Дзіяне Чарнушынай — па 2 гады пазбаўленьня волі ва ўмовах агульнага рэжыму; Андрусю Асмалоўскаму — 3 гады пазбаўленьня волі ва ўмовах агульнага рэжыму.
Казлова, Аляксееву і Кавалёву затрымалі 27 ліпеня 2022-га. Палітвязьняў абвінавачвацілі ва ўдзеле ў «Маршы новай Беларусі» ў Менску ў 2020 годзе (арт. 342 КК, «актыўны ўдзел у дзеяньнях, што груба парушаюць грамадзкі парадак»).
Мікалай Казлоў на судзе заявіў, што не разумее, у чым яго абвінавачваюць, бо гэта сумесь «дзіўнай лёгікі і нястрымнай фантазіі».
На пытаньне суду, ці прызнае сваю віну, ён адказаў: «Я прызнаю сябе больш пацярпелым, чым вінаватым». Кавалёва прызнала сваю віну часткова, Аляксеева — цалкам.
АГП — адна з найстарэйшых апазыцыйных партыяў Беларусі, існуе з 1995 году.
