Блізкія філёзафа Ўладзімера Мацкевіча не атрымліваюць ад яго вестак больш за два тыдні
«На сёньняшні дзень мы нічога ня ведаем ні пра ягонае месцазнаходжаньне, ні пра стан здароўя. У выніку арганізазванай інфармацыйнай блякады сваякі ня могуць адправіць неабходныя лекі», — гаворыцца ў паведамленьні суполкі ў Фэйсбуку, прысьвечанай Мацкевічу.
Таксама там адзначаюць, што перапіска з палітзьняволеным блякуецца, адваката да яго не дапускаюць, спыніліся таксама дазволеныя рэглямэнтам калёніі званкі сваякам, а адміністрацыя ПК-17 «даведак не дае».
- Уладзімер Мацкевіч — грамадзка-палітычны дзеяч, тэлевядоўца, заснавальнік і кіраўнік Агенцтва гуманітарных тэхналёгій, першы старшыня Рады міжнароднага кансорцыюму «ЭўраБеларусь», заснавальнік «Лятучага ўнівэрсытэту» і сябра асноўнага складу Каардынацыйнай рады.
- Яго затрымалі 4 жніўня 2021 году.
- У лютым 2022 году, праз паўгода зьняволеньня, ён трымаў галадоўку 13 дзён з патрабаваньнем перадаць ягоную справу ў суд і прызначыць дату судовага разбору. Гэта выклікала шырокі рэзананс, у падтрымку Мацкевіча выказаліся сотні навукоўцаў, літаратараў, філёзафаў з усяго сьвету.
- 23 чэрвеня 2022 году Ўладзімера Мацкевіча асудзілі на 5 гадоў калёніі, прызнаўшы яго вінаватым паводле трох артыкулаў Крымінальнага кодэксу: ч. 1 арт. 342 (арганізацыя і падрыхтоўка дзеяньняў, што груба парушаюць грамадзкі парадак, або актыўны ўдзел у іх), ч. 1 арт. 361-1 (стварэньне экстрэмісцкага фармаваньня) і ч. 1 арт. 368 (абраза прэзыдэнта). Працэс адбываўся з 9 чэрвеня ў закрытым рэжыме.
- Цяпер філёзаф знаходзіцца ў папраўчай калёніі № 17 у Шклове. У кастрычніку яго імя дадалі ў сьпіс «экстрэмістаў» МУС.
Жонка Фядуты ня можа даведацца, ці выпісалі яго з турэмнай бальніцы
«Апошні ліст ад мужа быў 26 сьнежня мінулага года, — распавяла „Народнай Волі“ жонка Фядуты Марына Шыбко . — Тады ён паведаміў пра свае праблемы са здароўем і пра тое, што з турэмнай бальніцы выйдзе напачатку гэтага года. Таму, мяркую, Аляксандар ужо ў атрадзе.
У лістах муж таксама распавёў, што ў год дазволена перадаваць дзьве кніжныя бандэролі, у кожнай зь якіх не больш за пяць кніг. Гэта яго вельмі засмуціла, бо дзесяць кніг у год — вельмі мала. Ён напісаў, над чым яшчэ зьбіраецца працаваць, таму трэба будзе замаўляць пэўныя кнігі».
Па словах Марыны Шыбко, яе не зьдзівіла, што муж трапіў у турэмную бальніцу.
«У яго, як вядома, яшчэ ў СІЗА былі досыць вялікія праблемы са здароўем, нават кропельніцы ставілі, — адзначыла жанчына. — А зараз, відаць, хваробы абвастрыліся. У апошнім лісьце Саша напісаў, што дашле мне сьпіс лекаў, якія яму парэкамэндуюць дактары, але, як ужо казала, у гэтым годзе ніякіх паведамленьняў ад яго пакуль не атрымлівала. Чакаю...»
- Палітоляга Аляксандра Фядуту асудзілі на 10 гадоў зьняволеньня па «справе аб змове». Яго разам зь Юрасём Зяньковічам і Рыгорам Кастусёвым зьвінавацілі ў спробе зрынуць Аляксандра Лукашэнку.
- Праваабаронцы палічылі справу справакаванай і сфальсыфікаванай і прызналі асуджаных па ёй палітзьняволенымі.
