Беларусь ня трапіла ў апошнія санкцыйныя пакеты Эўразьвязу, бо такая пазыцыя Ўкраіны, паведаміў журналіст Радыё Свабода з Брусэля Рыкард Юзьвяк.
Па яго словах, украінскі бок патрабаваў ня ўводзіць дадатковыя санкцыі супраць рэжыму Лукашэнкі. Таму Беларусь ня трапіла пад санкцыі ЭЗ разам з Расеяй у апошніх санкцыйных пакетах.
Дзявяты пакет санкцый ЭЗ быў прыняты ў сьнежні. Тым часам у Брусэлі паскорылі працу над дзясятым пакетам санкцый супраць Расеі. Краіны-ўдзельніцы хочуць прыняць новы пакет да саміту Ўкраіна — Эўразьвяз у Кіеве, заплянаванага на пачатак лютага. Пра гэта паведаміла польскае інфармацыйнае агенцтва PAP.
Кіраўніца Эўракамісіі Урзуля фон дэр Ляен сказала 11 студзеня:
«Мы будзем ціснуць на Крэмль санкцыямі столькі, колькі спатрэбіцца. Мы будзем распаўсюджваць санкцыі на тых, хто вайскова падтрымлівае вайну Расеі, такіх як Беларусь і Іран».
Кіраўніца Эўракамісіі: ЭЗ увядзе новыя санкцыі ў дачыненьні да рэжыму Лукашэнкі
Акрамя санкцый супраць Расеі, ЭЗ, паводле кіраўніцы Эўракамісіі, пашырыць санкцыі на краіны, якія падтрымліваюць расейскае ўварваньне ва Ўкраіну, у прыватнасьці на Беларусь і Іран.
«Мы неўзабаве ўвядзём новыя санкцыі супраць Беларусі ў адказ на яе ролю ў гэтай вайне Расеі супраць Украіны», — удакладніла яна.
Урзуля фон дэр Ляен таксама заявіла, што партнэры павінны перадаць Украіне баявыя танкі заходняга ўзору.
«Я гаварыла шмат разоў з пачатку расейскага ўварваньня ва Ўкраіну: я лічу, што Ўкраіна павінна атрымаць усю неабходную зброю, у якой яна мае патрэбу, каб яны маглі справіцца з абаронай сваёй радзімы. Гэта азначае, вядома, перадавыя сыстэмы СПА, але і іншыя віды перадавога вайсковага абсталяваньня, столькі, колькі неабходна для абароны Ўкраіны», — падкрэсьліла кіраўніца Эўракамісіі.
- У пачатку кастрычніка мінулага году Аляксандар Лукашэнка на нарадзе ў пытаньнях вайсковай бясьпекі прызнаў, што Беларусь бярэ ўдзел у «спэцыяльнай ваеннай апэрацыі» Расеі ва Ўкраіне.
- Афіцыйна беларускае войска не прымае ўдзелу ў поўнамаштабнай вайне Расеі з Украінай, аднак Лукашэнка даў тэрыторыю Беларусі для праезду і часовай дыслякацыі расейскіх войскаў, а зь яе тэрыторыі наносяцца ўдары па Ўкраіне. З прычыны дапамогі Расеі ў вайне супраць Украіны і масавых рэпрэсій ЗША, ЭЗ і Вялікая Брытанія ўвялі супраць Беларусі санкцыі.
- Пры гэтым грамадзяне Беларусі ваююць на баку Ўкраіны, дакладная колькасьць беларусаў, якія бяруць удзел у вайне, невядома. Вядома пра некалькіх забітых. Сьвятлана Ціханоўская заяўляла аб 1500 беларусах, якія ваююць ва Ўкраіне. У пэтыцыі аб наданьні грамадзянства іншаземцам, якія ваююць на баку Ўкраіны, згадваюцца больш за дзьве тысячы грамадзянаў Беларусі, якія ўдзельнічаюць у абароне краіны.
