Чарговай абвінавачанай па «справе Зельцара» прысудзілі 2,5 года калёніі
10 жніўня Менскі гарадзкі суд разгледзеў справу палітзьняволенай Алены Несьцяровіч, якую абвінавачвалі ў зьдзяйсьненьні злачынстваў па ч. 1 арт. 130 «Распальваньне расавай, нацыянальнай, рэлігійнай альбо іншай сацыяльнай варожасьці або варажнечы» і арт. 369 «Абраза прадстаўніка ўлады».
Алену затрымалі ў межах крымінальнай справы, заведзенай за камэнтары ў сацсетках пра гібель супрацоўніка КДБ Дзьмітрыя Федасюка і айцішніка Андрэя Зельцара.
Судзьдзя Вера Галаўкова прызначыла Несьцяровіч 2,5 года пазбаўленьня волі з адбыцьцём пакараньня ў калёніі агульнага рэжыму, паведамляе «Вясна».
Жыхару Горадні прысудзілі 3 гады і 4 месяцы калёніі за абразу Лукашэнкі і прадстаўніка ўлады
Сёньня праваабаронцам стала вядома, што ў судзе Ленінскага раёну Горадні 2 жніўня вынесьлі прысуд палітвязьню Аляксандру Лаўрэнцьеву, якога абвінавачвалі паводле арт. 368 КК (абраза Лукашэнкі) і 369 КК (абраза прадстаўніка ўлады). Яму прысудзілі 3 гады і 4 месяцы зьняволеньня ў калёніі ва ўмовах агульнага рэжыму. Падрабязнасьці судовага працэсу высьвятляюцца, піша «Вясна».
Палітзьняволеную асудзілі на «хатнюю хімію», але ня вызвалілі ў залі суду: яе чакае другі суд
8 жніўня ў судзе Цэнтральнага раёну Менску вынесьлі прысуд 31-гадовай палітзьняволенай Веры Валністай. Ёй прысудзілі два гады абмежаваньня волі без накіраваньня ў папраўчую ўстанову адкрытага тыпу («хатняя хімія») паводле арт. 369 Крымінальнага кодэксу («Абраза прадстаўніка ўлады»). Таксама, згодна з рашэньнем судзьдзі Дзьмітрыя Карсюка, яна мусіць кампэнсаваць пацярпеламу маральную шкоду ў памеры 1000 рублёў.
Аднак праваабаронцам стала вядома, што палітзьняволеная застаецца ў СІЗА; яе чакае суд ужо паводле ч. 1 арт. 342 Крымінальнага кодэксу («Арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх»), піша «Вясна».
Затрымалі адміністратара Instagram-старонкі «Гродно для жизни»
Яўгена Стральчэню абвінавачваюць у распаўсюдзе асабістых дадзеных больш як 2000 сілавікоў, адміністраваньні старонкі ў Instagram «Гродно для жизни», а таксама ва ўдзеле ў мірных акцыях пратэстаў у 2020 годзе, паведамляе тэлеграм-канал «Право имеют».
ГУБАЗіК затрымаў чарговую прадстаўніцу IT-індустрыі
Праўладныя тэлеграм-каналы паведамляюць пра затрыманьне 32-гадовай супрацоўніцы IT-кампаніі Анастасіі Гунько. Паводле іх, у 2020 годзе дзяўчына брала ўдзел у акцыях пратэсту і перакрывала рух транспарту. На «пакаяльным відэа» Анастасію прымушаюць назваць свой заробак, піша «Вясна».
ByPol хочуць прызнаць тэрарыстычнай арганізацыяй
Генпракурор Андрэй Швед накіраваў у Вярхоўны суд заяву аб прызнаньні арганізацыі ByPol тэрарыстычнай, разам са структурнымі падразьдзяленьнямі «Сытуацыйна-аналітычны цэнтар» і «Мабілізацыйны плян „Перамога“», якія ўваходзяць у яе.
Жыхароў Сьветлагорску выклікаюць у міліцыю пад рознымі прычынамі і просяць паказаць мабільныя тэлефоны — шукаюць «экстрэмізм»
Як паведамляюць са Сьветлагорску, у міліцыю людзей выклікаюць нібыта як сьведак у сувязі з дарожна-транспартнымі здарэньнямі, скаргамі ад суседзяў на шум і г.д. Пасьля агляду тэлефона складаюць пратакол аб адміністрацыйным правапарушэньні паводле часткі 2 артыкула 19.11 КаАП — «Распаўсюджваньне, выраб, захоўваньне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасьці альбо прапагандуе такую дзейнасьць». Потым адміністрацыйную справу накіроўваюць у суд, паведамляе «Гомельская Вясна».
