«Я прыняў рашэньне аб адхіленьні ад пасады генэральнага пракурора і аб адхіленьні кіраўніка Службы бясьпекі Ўкраіны.
На сёньня зарэгістравана 651 крымінальная вытворчасьць аб дзяржаўнай здрадзе і калябарацыйнай дзейнасьці работнікаў органаў пракуратуры, органаў дасудовага расьсьледаваньня, іншых праваахоўных органаў. У 198 крымінальных выпадках адпаведным асобам паведамілі аб падазрэньні.
У прыватнасьці, больш за 60 работнікаў органаў і СБУ засталіся на акупаванай тэрыторыі і працуюць супраць нашай дзяржавы.
Такі масіў злачынстваў супраць асноў нацыянальнай бясьпекі дзяржавы і сувязі, зафіксаваныя паміж работнікамі сілавых структур Украіны і спэцслужбамі Расеі, задаюць вельмі сур’ёзныя пытаньні адпаведным кіраўнікам. Кожнае з такіх пытаньняў атрымае належны адказ», — заявіў Зяленскі.
Хто будзе ўзначальваць СБУ, пакуль невядома. А вось выкананьне абавязкаў генпракурора ўскладзена на Аляксея Сіманенку, гаворыцца ў адным з указаў. Сіманенка зьяўляецца намесьнікам генпракурора.
Баканаў узначаліў СБУ ў жніўні 2019-га, Венядзіктава стала генпракурорам у сакавіку 2020 году.
