«Вестку пра сьмерць Янкі Запрудніка ўспрыняла з глыбокім смуткам, бо адышоў у Вечнасьць чалавек, якога ведала зь юнацтва, — гаворыць Івонка Сурвіла. — У тыя гады спадар Янка быў паплечнікам старшыні Рады БНР Міколы Абрамчыка».
Старшыня Рады БНР адзначыла, што Запруднік быў ня толькі знаны гісторык, прызнаны аўтар публіцыстычных артыкулаў, але і актыўны грамадзкі дзеяч.
«Цягам сваёй шматгадовай дзейнасьці ў Радзе БНР Янка Запруднік вельмі шмат зрабіў для таго, каб у сьвеце не забываліся пра беларусаў, пра беларускі народ і ягонае права на сваю незалежную дзяржаву, — кажа Івонка Сурвіла. — Я да яго часта зьвярталася па парады і заўсёды атрымлівала кваліфікаваную дапамогу. Ён быў вельмі адказным чалавекам, а таксама чулым, добрым сябрам. Вечная памяць».
