Пра гэта паведаміла ў фэйсбуку сябра журы Ірэна Кацяловіч.
«Калі б мы не знаходзіліся ў розных краінах, то з калегамі-кінакрытыкамі, напэўна, выпілі б сёньня ўвечары віна. За тое, што мы арганізавалі першую Прэмію беларускай кінапрэсы „Чырвоны верас“ і зрабілі яе аскетычнай і прыгожай, — напісала Ірэна Кацяловіч. — У нас ня будзе цырымоній, інструмэнтальнай музыкі ў холе і выхадаў на сцэну: шмат хто з нас ня ў Менску, а вакол вайна. Але спадзяюся, гэтыя адзнакі нагадаюць: беларусам патрэбна беларускае кіно».
Ліст пераможцаў прэміі беларускай кінапрэсы «Чырвоны верас» выглядае так:
- Найлепшы ігравы поўнамэтражны фільм: «II» («Два») Улады Сяньковай.
- Найлепшы ігравы кароткамэтражны фільм: «Возера радасьці» Аляксея Палуяна.
- Найлепшы поўнамэтражны дакумэнтальны фільм: «Чыстае мастацтва» Максіма Швэда.
- Найлепшы кароткамэтражны дакумэнтальны фільм: «Тата» Марыі Якімовіч.
- Найлепшы анімацыйны фільм: «Царства зорак» Івана Гапіенкі.
- Найлепшы рэжысэр: Максім Швэд.
- Найлепшы актор: Мікалай Бандарэнка за ролю ў фільме «Дэзэртыр» (рэжысэр Саша Сьцельчанка).
- Найлепшая актрыса: Настасься Пляц за ролю ў фільме «Возера радасьці» (рэжысэр Аляксей Палуян).
- Найлепшая праца апэратара: Арцём Лобач за фільм «Шлях дадому».
- Найлепшы сцэнар: Любоў Зямцова за фільм «Месца каханьня».
- Найлепшая праца мастака-пастаноўшчыка: Менскія ЖЭСы за фільм «Чыстае мастацтва» (рэжысэр Максім Швэд).
- Найлепшая музыка ў фільме: Уладзімір Сівіцкі і Іван Кірчук за фільм «Код продкаў» (рэжысэр Уладзімір Луцкі).
- Адкрыцьцё году: рэжысэрка Марыя Якімовіч.
Раней паведамлялася, што арганізатарамі прэміі «Чырвоны верас» сталі чацьвёра журналістаў: Ірэна Кацяловіч, Дар’я Амяльковіч, Максім Карпіцкі і Тарас Тарналіцкі.
Дызайн прэміі стварыў прадпрымальнік і рэжысэр Іван Масьлюкоў.
Вырашаў лёс стужак пашыраны склад журы, у які, апроч сяброў аргкамітэту прэміі, увайшлі вядомыя журналісты, кіназнаўцы, дасьледчыкі і блогеры, якія займаюцца тэмай кіно: Максім Жбанкоў, Ігар Сукманаў, Ірына Дзям’янава, Андрэй Расінскі, Антон Каляга, Ульляна Будзік, Юры Кастузік, Галіна Шур, Вольга Раманава і г.д. — усяго 18 асобаў.
