«У сувязі з закрыцьцём часткі паветранай прасторы Расейскай Фэдэрацыі для палётаў цывільнай авіяцыі авіякампанія «Белавія» вымушаная скарэктаваць маршруты многіх рэйсаў, у тым ліку чартэрных», – гаворыцца ў афіцыйным паведамленьні «Белавія».
Рэйсы ў Хургаду і Шарм-Эль-Шэйх будуць выконваць самалёты Boeing 737-800 па новых маршрутах:
- Менск – Актаў (тэхнічная пасадка) – Шарм-эль-Шэйх – Актаў (тэхнічная пасадка) – Менск;
- Менск – Актаў (тэхнічная пасадка) – Хургада – Актаў (тэхнічная пасадка) – Менск.
«У сувязі з гэтым значна павялічыўся палётны час, неабходная колькасьць паліва, выдаткі за аэранавігацыйнае абслугоўваньне, а таксама выдаткі, зьвязаныя з двума дадатковымі прамежкавымі пасадкамі ў Актаў пры выкананьні чартэрных рэйсаў. Улічваючы пералічаныя абставіны, авіякампанія вымушаная павысіць кошт выкананьня чартэрных рэйсаў у Эгіпет з 11 сакавіка 2022 году», – паведамілі ў «Белавія».
Як паведамілі Zerkalo.io прадстаўнікі адной з турыстычных кампаній, іх апавясьцілі ў рассылцы, што павышэньне кошту паездкі ў Эгіпет для кліентаў складзе 170 даляраў з чалавека.
Раней турыстычны апэратар «Тэз Тур» прыняў рашэньне аб прыпыненьні выкананьня чартэрных рэйсаў у Эгіпет з 5 сакавіка: пасажыры, якія знаходзяцца на адпачынку, будуць дастаўленыя ў Беларусь вывазнымі рэйсамі. Іншыя турыстычныя апэратары пацьвердзілі свае пляны працягу палётных праграм на курорты Эгіпту.
