На крычаўскага журналіста, былога рэдактара газэты «Вольны горад» Сяргея Няроўнага завялі адміністрацыйную справу за тое, што на ягонай старонцы ў Facebook «разьмешчаная інфармацыйная прадукцыя, а менавіта адзнака „падабаецца“, інтэрнэт-сайта „Беларускі партал Tut.by“, які рашэньнем суду Цэнтральнага раёну г. Менску ад 13 жніўня 2021 году ўключаны ў рэспубліканскі сьпіс экстрэмісцкіх матэрыялаў». Так запісана ў рапарце ўчастковага інспэктара Крычаўскага РАУС Сьцепаненкі, які цытуе Праваабарончы цэнтар «Вясна».
З прычыны гэтага лайку ў мінулую суботу Сяргея Няроўнага затрымалі, агледзелі дом, забралі тэхніку, а самога пакінулі ў ізалятары да суду.
Працэс над Сяргеем Няроўным пачаўся 18 кастрычніка, аднак судзьдзя Азаранка пастанавіў зрабіць перапынак да 20 кастрычніка.
