Дата дня
2 верасьня 1943 году нарадзіўся Барыс Гюнтэр, дэпутат Апазыцыі БНФ у Вярхоўным Савеце 12-га скліканьня, адзін з аўтараў пакету дакумэнтаў, якія ляглі ў падмурак прынятых 25 жніўня 1991 году пастановы аб абвяшчэньні незалежнасьці Беларусі, удзельнік галадоўкі дэпутатаў 11-12 красавіка 1995 году ў Авальнай залі, абвешчанай на знак пратэсту супраць ініцыяванага Лукашэнкам рэфэрэндуму.
Барыс Гюнтэр нарадзіўся ў сям’і актораў. Маці — расейка, бацька — з павалжанскіх немцаў. З 8 гадоў жылі ў Разані прама ў тэатры.
Пасьля таго, як васьмігадовы Барыс сунуў алавяннага салдаціка ў разэтку і выключыў усё сьвятло ў тэатры, нехта напісаў данос, што хлопец сарваў патрыятычны спэктакль. Гэта расцанілі як дывэрсію і арыштавалі бацькоў Барыса, а праз тры дні і яго самога. З бацькамі Барыс сустрэўся толькі праз тры гады — калі іх вызвалілі. Хлопчыка месяц трымалі ў разанскім сьледчым ізалятары, у камэры разам зь ім было каля 30 чалавек — дзяцей рознага ўзросту. Падчас допытаў Барыса фізычна катавалі, выбіваючы прызнаньне, што нехта яго падштурхнуў да дывэрсіі. Суду не было. Перавезьлі ў Маскву і адправілі на двухмесячны этап да гораду Ангарску ў дзіцячы дом для дзяцей асуджаных. Бацькі вызваліліся ў 1954 годзе, уладкаваліся на працу ў Іркуцку і толькі потым маглі забраць сына з інтэрнату. (Віртуальны музэй савецкіх рэпрэсій ў Беларусі).
Год таму, 2 верасьня 2020
- Юрыст Максім Знак паведаміў, што ўлады палохаюць бацькоў адабраньнем дзяцей за ўдзел у пратэстах.
- Уладзімер Макей у Маскве заявіў, што ў Беларусі спынілі каляровую рэвалюцыю.
- Больш за 1100 работнікаў чыгункі патрабуюць адстаўкі Лукашэнкі і новых выбараў.
- Надпіс «Не забудзем!» на месцы гібелі Аляксандра Тарайкоўскага ля мэтро «Пушкінская» засыпалі пяском.
- Адбыўся ператрус у кампаніі Мікіты Мікады. Ён прапанаваў дапамогу сілавікам, якія пакінуць службу.
- Купалаўскі тэатар адмяніў паказы ўсіх спэктакляў да канца лістапада.
Таксама ў гэты дзень
1192 — скончыўся трэці крыжовы паход, кароль Рычард Львінае Сэрца і султан Саладын падпісалі мірную дамову.
1834 — Сэм’юэл Кольт запатэнтаваў рэвальвэр.
1928 — у Ленінградзе стварылі кінастудыю «Савецкая Беларусь». У 1939 годзе студыя пераехала ў Менск, у 1946 годзе яе перайменавалі ў «Беларусьфільм».
1945 — капітуляцыяй Японіі скончылася Другая сусьветная вайна.
1971 — Аб’яднаная Арабская Рэспубліка распалася на Егіпет і Сырыю
1991 — Нагорна-Карабаская Рэспубліка абвясьціла незалежнасьць ад Азэрбайджану
1996 — ва Ўкраіне ўвялі нацыянальную валюту — грыўну.
У гэты дзень нарадзіліся
1911 — Юлі Таўбін, беларускі паэт, перакладчык. У ноч з 29 на 30 кастрычніка 1937 у ліку 26 беларускіх літаратараў быў расстраляны ў двары турмы НКВД.
1955 — Яўген Мірановіч, беларускі і польскі гісторык, грамадзка-культурны дзеяч.
У памяці
1800 — Мацей Радзівіл, беларускі драматург, кампазытар, аўтар лібрэта апэрэт.
1814 — Жан Эмануэль Жэлібэр, францускі натураліст, хірург і анатом, стваральнік і кіраўнік Гарадзенскай мэдыцынскай акадэміі.
1973 — Джон Рональд Руэл Толкін, брытанскі пісьменьнік і мовазнаўца.
1998 — Мікола Гайдук, беларускі пісьменьнік, журналіст, краязнавец, настаўнік.
